Díli, 15/05/2023. Prezidente Komisaun Ezekutiva (K.E) Bee Timor-Leste, Empreza Públika (BTL, E.P), Eng. Carlos Peloi dos Reis rejeita informasaun ne'ebé hatete katak Projetu Pakote Konstrusaun Sistema Bee Moos no Supply & Installation Liner Tank iha suku Vila-Verde, postu-administrativu Vera Cruz, munisípiu Díli ne'e abandona.
Prezidente KE BTL, E.P konsidera informasaun ne'e la loos. Tanba kompañia implementadór hala'o hela servisu ou obra fíziku daudaun ne'e la'o hela iha terrenu. Ezekutivu BTL, E.P hato'o asuntu ne’e, iha ámbitu seremónia asina kontratu ho kompañia manan na’in, iha edifísiu sentrál BTL, E.P, Caicoli.
“Servisu agora la’o namanas hela, espera sira (kompañia) bele halo hotu iha tempu badak. Hanesan ha’u dehan katak tanke to’o mai ona, kompañia sira halo hela servisu, espera sira bele halo hotu, entaun ita bele lori bee ba to’o iha tanke ida iha foho leten ne’e, para ita komesa fornese ba ita nia komunidade sira. Dala ida tan, projetu ne’e la’ós abandonadu, maibé ita halo fazeadamente, fura uluk tiha bee no bee iha tiha lai mak ita ba dada. esplika Ezekutivu BTL, E.P
Enkuantu projetu Supply & Installation Liner Tank iha Vila-Verde daudaun ne’e la’o hela no obra fíziku atinji ona pursentu 15 (15%). Tanba fondasi ba lutu ou moru protesaun no cor ring beam nian finaliza ona, materiál ba tanke bee nian mos to’o ona iha Timor-Leste (TL) no ekipa téknika hosi kompañia nian ke’e ona rai hodi instala kanu transmisaun no distribuisaun sira.
Enkuantu projetu refere implementa hosi kompañia Arlei Henlice Unipessoal Lda, ho durasaun tempu fulan neen. No orsamentu ne’ebé gasta ba projetu refere hamutuk $ 86,392.40.
Alende ne’e, Sistema Bee Moos ne’ebé sei kanaliza ba komunidade sira ne’e, mai hosi sistema bomba ne’ebé nia perfurasaun finaliza ona. No perfurasaun bomba refere nia fundus mai hosi liña ministeriál sira nomos orsamentu ba konstrusaun moru protesaun iha bomba ne’e rasik, mai hosi Fundus Infraestrutura. Ho nune’e, kompañia sei utiliza bomba refere, hodi kanaliza ba komunidade sira iha suku Vila-Verde.
Projetu Pakote Konstrusaun Sistema Bee Moos ne’e, sei benefisia ba komunidade uma kain rihun tolu resin ho nia populasaun 15.344, ne’ebé mai hosi aldeia sia hanesan Guideon, Lemorai, Matua, Mate Moris, Mate Resto, Nopen, Terus Nain, 01 de Setembro no Virgolosa, suku Villa Verde, postu-administrativu Vera Cruz, munisípiu Díli.
Share on Social Media:
