Covalima, 27 Fevereiru 2026. Diretór DEI BTL, E.P, João da Cruz Cardoso ho Jestór Infraestrutura BTL, E.P hamutuk ho Koordenadór BTL, E.P Munisípiu Covalima, monitoriza implementasaun projetu konstrusaun sistema fornesimentu bee moos, iha Postu-adminitrativu Fatululik, Munisípiu Covalima. Monitorizasaun ne'e akompaña hosi Administradór Postu-adminitrativu Fatululik no Lideransa Komunitária suku Beidasi.
Atividade monitorizasaun ne'e, hodi observa direta progresu fíziku iha terrenu, nune'e bele garante kualidade obra ne'e rasik nomos atu hatene persentajen servisu hosi projetu referidu.
Relativamente ba rezultadu monitorizasaun nian iha terrenu katak, daudaun ne’e, projetu fíziku atinji ona pursentu 75 (75%) no obra ne'e implementa hosi kompañia Laviana Dezes Unip, Lda.
Durante monitorizasaun iha terrenu, parte BTL, E.P husu ba kompañia implementadór, atu aselera obra fíziku, nune’e bele finaliza lalais hodi fornese bee moos ba komunidade sira. Maibé tenke servisu tuir dezeñu ne'ebé mak iha ona, hodi garante nia kualidade, atu nune'e sistema refere bele dura ba tempu naruk.
Investimentu sistema bee ne'e, wainhira finaliza sei fornese bee moos ba populasaun sira iha suku rua hanesan suku Beidasi no Taroman, PA Fatululik inklui fasilidade públika sira.
Maske seidauk obra refere seidauk finaliza 100%, maibé daudaun ne’e, abitante sira iha área Beidasi, Beco, Lia-Na’in no Taroman hahú asesu ona bee moos hosi sistema ne’e.
Share on Social Media:
