Covalima, 24/01/2024, Ekipa hosi Departamentu Infraestrutura akompaña hosi Supervisor no Koordenadór Bee Timor-Leste, Empreza Públika (BTL, E.P) munisípiu Covalima, iha loron 16 fulan janeiru tinan 2024 ne'e, halo monitorizasaun ba projetu fíziku kona-bá konstrusaun sistema bee moos ne'ebé implementa hela iha postu-administrativu Zumalai, munisípiu Covaima.
Objetivu hosi monitorizasaun ne'e, hodi observa direta progresu servisu fíziku ne'ebé la'o hela iha terrenu, atu bele garante kualidade projetu ne'e rasik, nune'e wainhira obra refere finaliza, komunidade sira bele utiliza to'o tempu naruk. No daudaun ne'e, projetu fíziku atinji ona pursentu 75 (75%)
Projetu konstrusaun sistema bee moos ne'e ezekuta hosi kompañia Mamaletu Unipessoal Lda, ho durasaun tempu fulan neen no tuir previzaun, iha finál fulan janeiru ne’e, obra fíziku bele atinji ona to’o 95%.
Enkuantu projetu refere wainhira finaliza, iha futuru sei benefisia ba populasaun no sei fornese mos bee ba fasilidade públiku ne’ebé eziste iha postu-administrativu ne’e.
Alende ne'e, Tuir planu, projetu sistema bee moos ne'ebé BTL, E.P promove iha postu-administrativu sira, sei ho sistema urbana, iha ne'ebé sei kanaliza bee direta ba populasaun sira nia hela fatin no instala mos metru kontadór ba uma kain ida-idak.
Share on Social Media:
