Manatuto, 25/01/2024, Iha loron 19 fulan ne'e, ekipa hosi Departamentu Infraestrutura akompaña hosi Supervisor Bee Timor-Leste, Empreza Públika (BTL, E.P) ne'ebé destakadu iha postu-Administrativu Soibada, halo monitorizasaun ba konstrusaun sistema bee moos ne'ebé implementa hela iha postu-administrativu Soibada, munisípiu Manatuto.
Atividade monitorizasaun ne'e, hodi haree direta progresu servisu fíziku ne'ebé la'o hela iha terrenu, atu garante kualidade projetu ne'e rasik, nune'e wainhira obra refere finaliza, populasaun sira bele uza to'o tempu naruk.
Bazeia ba rezultadu monitorizasaun nian, daudaun ne'e, obra fíziku atinji ona pursentu 50 (50%), projetu ne'e, impelementa hosi kompañia Wetodo Unipessoal Lda JV Unipessoal Lda, ho durasaun tempu fulan neen.
Enkuantu projetu konstrusaun sistema bee moos ne'e, wainhira finaliza, sei benefisia abitante sira iha Soibada nomos sei fornese bee moos ba instituisaun Estadu nian ne’ebé eziste iha postu-administrativu ne’e.
Tuir informasaun hosi supervisor BTL, E.P nian ne'ebé durante ne'e, akompaña servisu fíziku iha terrenu katak, ohin kompañia Wetodo Unipessoal Lda hahú instala kanu transmisaun hosi bee matan ba Soibada Villa.
Alende ne'e, Tuir planu, projetu sistema bee moos ne'ebé BTL, E.P promove iha postu-administrativu sira, sei ho sistema urbana, iha ne'ebé sei kanaliza bee direta ba populasaun sira nia hela fatin no instala mos metru kontadór ba uma kain ida-idak.
Share on Social Media:
