Manatuto, 14/09/2023. Vise-Prezidente Komisaun Ezekutiva (KE) Bee Timor-Leste (BTL, EP), ba Asuntu Boa Governasaun no Fortalesimentu Institusionál Sra. Elizabeth Amaral, akompaña hosi Diretór Enjeñaria no Investimentu Eng. João Cardoso, Jestór Infraestrutura no BTL, EP Munisípiu Manatuto, halo monitorizasaun ba Projetu Emerjénsia kona-bá kanalizasaun bee moos, iha mota Weten ne’ebé lokaliza iha aldeia Rembor, suku Aiteas, postu-administrativu Manatuto Villa, munisípiu Manatuto.
Atividade monitorizasaun ne’e hodi observa direta servisu fíziku iha terrenu nomos hodi hatene progresu hosi obra ne’e rasik. Ho nune’e, bazeia ba rezultadu monitorizasaun ne’e, obra fíziku atinji ona mais ou menos pursentu 65 (±65%).
Iha biban ne’e, ekipa BTL, E.P mos bá vizita bee matan iha Weten ne'ebé durante ne'e fornese bee moos ba kapitál munisípiu Manatuto nian, hodi haree direta kondisaun bee matan refere. Durante vizita iha terrenu, Sra. Vise-Prezidente fó orientasaun ba ekipa BTL, E.P munisípiu Manatuto, atu hamoos no hadi'a bee matan ne’e nomos husu ba tékniku sira atu kuda ai-horis sira, iha bee matan refere, hodi konserva bee, nune'e volume bee nafatin boot, hodi kontinua fornese bee moos di'ak liu tan ba komunidade sira, iha kapitál munisípiu Manatuto.
Daudaun ne’e, kompañia implementadór kontinua halo servisu iha terrenu no tuir planu, iha fulan hirak oin mai, kompañia ne’e sei finaliza projetu fíziku, nune’e bele hahú fornese ona bee ba komunidade sira iha Manatuto. Enkuantu orsamentu ne’ebé finansia ba projetu ne’e mai hosi Fundu Infraestrutura (FI).
Share on Social Media:
