Manatuto, 10/11/2023. Diretór Enjeñaria no Investimentu Bee Timor-Leste, Empreza Públika (BTL, E.P) akompaña hosi Jestór Infraestrutura no Koordenadór BTL, E.P munisípiu Manatuto, halo monitorizasaun ba projetu Emergency Supply and Gabion Construction for Weten Transmission Pipeline ne’ebé lokaliza iha aldeia Rembor, suku Aiteas, postu-administrativu Manatuto Villa, munisípiu Manatuto.
Alende monitorizasaun, prezensa ekipa BTL, E.P iha fatin ne’e mos hodi akompaña traballadór hosi kompañia konstrutór nian halo servisu backfill ou ateru rai ba kanál instalasaun kanu transmisaun bee moos ne’ebé finaliza ona no servisu fíziku refere mak finál ona hosi projetu konstrusaun ba liña transmisaun iha Weten, Manatuto.
Atividade monitorizasaun ne’e, hodi observa direta progresu servisu fíziku ne’ebé la’o hela iha terrenu, atu bele garante kualidade projetu ne’e rasik, nune’e wainhira obra refere finaliza, populasaun sira bele utiliza to’o tempu naruk.
Bazeia ba rezultadu monitorizasaun katak, daudaun ne’e, projetu fíziku ba konstrusaun kanu transmisaun bee moos nian, atinji ona pursentu 100 (100%). Enkuantu projetu ba liña transmisaun ne’e, hodi kanaliza bee ba populasaun sira, iha Manatuto Villa.
Tuir informasaun hosi Koordenadór BTL, E.P munisípiu Manatuto, maske projetu fíziku foin atinji 100%, maibé iha fulan kotuk ou loron 27 fulan outubru tinan 2023 ne’e, tékniku BTL, E.P Manatuto distribui ona bee refere ba konsumidór sira iha Manatuto Villa, durante oras 24 nia laran.
Projetu Emergency Supply and Gabion Construction for Weten Transmission Pipeline, iha kapitál Manatuto ne’e, implementa hosi kompañia Dyanyl Unip, Lda ho durasaun fulan neen. No orsamentu ne’ebé gasta ba projetu refere, mai hosi Fundus Infraestrutura (FI).
Share on Social Media:
