Díli, 26/05/2023, Ekipa BTL, EP kompostu hosi Departamentu Aprovizionamentu no Diresaun Enjeñaria no Investimentu (DEI) realiza prebid meeting ho kompañia sira, kona-bá projetu Projetu Perfurasaun Bee Moos, ba iha suku Soru, munisípiu Lautém. Prebid meeting ne’e realiza iha salaun enkontru, edifísiu sentrál BTL, E.P, Caicoli.
Prebid meeting ne’e, hodi ko’alia kona-bá atividade ba prosesu kontinuasaun hosi site visit ne’ebé antes ne’e ekipa DEI ho kompañia sira hala’o ona iha terrenu no faze sira tuir mai, molok implementa projetu refere iha Soru.
Orsamentu ne'ebé prevé ba Projetu Perfurasaun Bee Moos iha suku Soru ne'e, ho montante $ 57,615.19. Enkuantu sistema perfurasaun bee refere, sei utiliza hodi dada ba populasaun sira ne’ebé hela iha suku Soru, liu-liu iha aldeia tolu hanesan, aldeia Omukanu, Foema no Nanakuru ho totál populasaun 1540 no uma kain 373.
Antes ne’e, iha loron 18 fulan maiu tinan 2023 ne’e, ekipa DEI lori ona kompañia sira ne’ebé partisipa iha prosesu tenderizasaun ne’e, bá haree direta ona fatin ne’ebé sei implementa projetu Perfurasaun Bee Moos nian ne’ebé lokaliza iha suku Soru, atu nune’e wainhira kompañia ne’ebé mak manan tender ba projetu ne’e, sira bele hatene ona fatin refere, nune’e sira bele hahú hala’o servisu fíziku, tuir dezeñu ne’ebé mak prepara ona hosi tékniku/enjeñeiru BTL, E.P nian.
Alende ne’e, Prebid meeting no site visit ne’e, hanesan mandatória iha dokumentu konkursu ba projetu konstrusaun no melloramentu sistema fornesimentu bee moos inklui supply & instalasaun materiál sira.
Share on Social Media:
