Lautém, 13/04/2023. Ekipa Bee Timor-Leste, Empreza Públika (BTL, E.P) Nasionál hosi Diresaun Enjeñaria no Investimentu (DEI), foti dadus tékniku ba projetu melloramentu sistema bee moos, iha suku Cacavei, postu-administrativu Lospalos, munisípiu Lautém.
Molok tun ba terrenu hodi halo levantamentu tékniku ne’e, ekipa DEI hosi nasionál hala’o uluk koordenasaun ho lideransa suku no aldeia, hodi informa kona-bá objetivu no prezensa ekipa BTL, E.P nasionál nian, iha suku Cacavei.
Hafoin remata enkontru ekipa BTL, E.P nasionál akompaña hosi BTL, E.P munisípiu Lautém, autoridade lokál no komunidade balun tun kedas ba terrenu, hodi observa direta bee matan Neveru ne’ebé lokaliza iha suku Cacavei, maibé distánsia bee matan Neveru ba suku Cacavei Villa, kuaze kilómetru neen (kuaze 6km).
Objetivu hosi atividade levantamentu dadus tékniku ne’e, hodi identifika rekursu bee moos ne’ebé mak potensiál haktuir ba débitu bee ne’ebé mak tékniku sira sukat mo sura nomos foti koordenadas, observa tanke rezervatóriu no tanke BPT, observa lokál ne’ebé sei intalla liña transmisaun no distribuisaun bee nian, rekolla informasaun demografia no mapa limite administrative, identifika lokalizasaun edifísiu públiku sira nomos área abitasaun urbana. Hafoin levantamentu dadus ne'e, Enjeñeiru hosi DEI sei halo uluk dezeñu, análize idrólika no sura BoQ, molok hakat ba faze tuir mai.
Tuir rezultadu levantamentu tékniku katak, iha tempu udan, bee matan Neveru ho débitu 8lps, nune'e bee refere sufisiente ona, hodi kanaliza ba komunidade sira. Tanba ne'e, BTL, E.P planeia ona sei halo melloramentu ba sistema, nune'e bele reforsa sistema bee ne'ebé antes ne'e eziste ona, hodi fornese ba populasaun sira iha suku Cacavei. Alende ne'e, tuir planu sei konstroi mos tanke sedimentasaun ka tanke filtrasaun, tanba tuir observasaun iha terrenu no rezutadu teste katak, bee refere nakonu ho ahu ruin, tanba ne'e presiza prepara tanke filtrasaun, hodi filtra ahu ruin ou sedimentasaun sira, molok distribui bee ba abitante sira.
Enkuantu planu projetu melloramentu sistema refere, sei benefisia ba komunidade sira iha suku Cacavei, ho totál uma kain 423.
Share on Social Media:
