Díli, 17/01/2025, Prezidente Komisaun Ezekutiva (KE) Bee Timor-Leste, Empreza Públika (BTL, E.P), Sr. Gustavo da Cruz, akompaña hosi Diretór Enjeñaria & Investimentu (DEI) ho ekipa, hamutuk ho S.E Ministru Obras Públikas Interinu (MOP) no Vise-Ministru Infraestrutura (VMI), Sr. Júlio do Carmo, nomos Diretór Ezekutivu Millennium Challenge Account Timor-Leste, Institutu Públiku (MCA-TL, I.P), Sr. Embaixadór Constâncio Pinto ho ekipa akompaña no observa tékniku IGEADE, I.P, halo demolisaun ba lokál konstrusaun sentru tratamentu bee fo’er nian, ne’ebé lokaliza iha Bebonuk, postu-administrativu Dom Aleixo, Díli.
Ohin, hahú halo demolisaun ba fatin hirak ne’ebé identifikadu ba konstrusaun ETAR iha Bebonuk, hanesan faze inisiál, atu nune’e, hodi fó espasu ba kompañia ne’ebé halo estudu ba rai nian, hodi kontinua halo servisu, molok tama ba faze kontrusaun nian.
S.E Ministru Obras Públikas Interinu (MOP) no Vise-Ministru Infraestrutura (VMI), hatete atividade demolisaun iha fatin ne’e, hodi prepara ba sentru kontrusaun bee fo’er nian, nune’e bele akumula bee fo’er iha kapitál Díli, hodi halo tratamentu molok soe ba tasi
Ligadu ho indemnizasaun ba komunidade afetadu ba projetu ETAR Bebonuk ne’e, Governu konklui ona pagamentu iha loron 26 fulan novembru tinan 2024 liu ba, hanesan rai, uma, ai-horis inklui traballadór sira ne’ebé servisu iha fatin negósiu sira ne’ebé afetadu hosi projetu refere.
Ohin mos, ekipa konjunta ne'e, halo aproximasaun ho komunidade afetadu balun iha Ocean View nian no husu ba sira atu hamamuk fatin, tanba na'in ba rai ne'e hetan ona indemnizasaun iha tinan kotuk, tanba ne'e, sira tenke husik hela fatin refere, hodi fó biban ba Governu atu kontinua halo servisu.
Futuru estasaun tratamentu bee fo’er ne’e, lokaliza iha Bebonuk, Díli ho medida rai ne’ebé uza ba investimentu ne’e, hamutuk hektares 5.5. Enkuantu fundus ba projetu ne’e, mai hosi Governu Estados Unidos América liuhosi Millennium Challenge Corporation (MCC) ne’ebé servisu hamutuk ho MCA-TL, I.P nomos Governu Timor-Leste.
Share on Social Media:
