Díli, 28/04/2023, Vise-Prezidente KE BTL, E.P ba Asuntu Sistema Bee, Saneamentu no Drenajen, Sr. Gustavo da Cruz akompaña hosi ekipa Project Manager Unit-PMU BTL, E.P enkontru ho Grupu Tékniku Interministeriál (GTI) ne’ebé mai hosi BTL, E.P rasik, hosi Diresaun Jerál Terras no Propriedades (DGTP, sigla portugés), Ministériu Justisa (MJ), ekipa Diresaun Jerál Floresta hosi Ministériu Agrikultura no Peska (MAP), ekipa Diresaun Jerál Abitasaun no Urbanizmu (DGHU, sigla portugés), Diresaun Nasionál Edifikasaun (DNE) hosi Ministériu Obras Públikas (MOP), kona-bá projetu Dili Urban Water Supply. Reuniaun ne’e hala’o iha salaun enkontru edifísiu sentrál BTL, E.P, Caicoli.
Objetivu hosi enkontru ne’e, hodi ko’alia no halo koordenasaun kona-bá prosesu hosi reasentamentu ne’e nomos ekipa hosi liña ministeriál sira mai aprezenta mos relatóriu prelimináriu ne’ebé ekipa prepara ona, hafoin publikasaun rezultadu identifikasaun nian, nune’e hodi avansa ba faze sira tuir mai.
Antes ne’e, iha fulan outubru tinan kotuk (2022), ekipa GTI halo ona publikasaun kona-bá rezultadu identifikasaun ba dadus hosi komunidade ne’ebé afeta direta hosi projetu Dili Urban Water Supply, hodi fó tempu durante loron 90 ba komunidade afetada sira, hodi halo reklamasaun ou hodi hadi’a dadus balun ne’ebé seidauk loos, kona-bá rai, uma no aihoris sira no faze ida ne’e finaliza ona. No durante iha tempu publikasaun ne’e, iha balun mak reklama maibé rai parsela 10 mak laiha reklamasaun, signifika katak rai refere Estadu nian. Tuir planu ekipa GTI sei tun fila-fali ba terrenu, nune’e hodi informa hikas ba komunidade afetada no autoridade lokál sira katak, kondisaun ou rezultadu ida ne’e mak sei avansa ba oin.
Enkuantu tuir planu projetu Dili Urban Water Supply ne’e, sei kobre iha parte Malinamuk tanba sei installa rezervatóriu iha Malinamuk, estasaun tratamentu bee iha Bemos, Central Bairo-Pité, Lahane, Benamauk, Becusse no fatin seluk tan iha kapitál Díli ne’ebé mak afeta direta ba projetu ne’e.
No ekipa GTI sei kontinua realiza enkontru koordenasaun ne’e, hodi haree kona-bá estatutu rai nian no aihoris sira, atu ekipa GTI sira nian bele atualiza nafatin prosesu sira ne’e hotu, nune’e bele hakat ba faze sira tuir mai, molok implementasaun projetu refere.
Entretantu projetu Dili Urban Water Supply ne’e, nia fundus mai hosi parseiru sira, hanesan Banku Mundiál no ADB.
Share on Social Media:
