Díli, 26/11/2024, Prezidente Komisaun Ezekutiva (KE) Bee Timor-Leste, Empreza Públika (BTL, E.P), Sr. Gustavo da Cruz, partisipa iha diskusaun pormenor liga ba Estudu Viabilidade ba Barrajen Railaco/Gleno nian, ne’ebé realiza iha sala reuniaun DNRAS, Caicoli.
Objetivu hosi enkontru ne’e, hodi deskute detalla kona-bá estudu viabilidade ba barrajen Railaco/Gleno nian, liu-liu ba asuntu tolu hanesan análiza idráulika (hidráulica) rekursu bee, análiza viabilidade ekonómika nomos guideline ba preparasaun relatóriu nian. Hosi diskusaun ho parte relevante sira ne’e, hodi bele hetan feedback ou rekomendasaun sira, nune’e bele hadi’a no hodi hakat ba faze tuir mai, mak dezeñu báziku no Detailed Engineering Design (DED).
Durante iha diskusaun ne’e, ekipa konjunta finaliza ona pontu rua, mak estudu viabilidade ekonómikamente ba investimentu barrajen ne’e rasik nomos guideline ne’ebé antes ne’e propoin ona ba konsultór sira, atu kumpri ba elaborasaun relatóriu nian, konfirmadu prienxe ona rekezitu ne’ebé mak iha. Nune’e ohin, parte Ajénsia Dezenvolvimentu Nasionál, Institutu Públiku (ADN, I.P) no Diresaun Nasionál ba Regulasaun Bee no Saneamentu (DNRAS, sigla portugés) hamutuk ho konsultór Dongsung kontinua deskute kona-bá análiza idráulika nian.
Partisipa iha diskusaun ne’e, hosi parte ADN, I.P, PMU BTL, E.P/MOP, Sekretaridu Grande Projetu (MPS, sigla inglés) no DNRAS inklui konsultór Dongsung.
Share on Social Media:
