Díli, 28/09/2022. I Vise-Prezidente Komisaun Ezekutiva (K.E) Bee Timor-Leste, Empreza Públika (BTL, E.P), Sr. Gustavo da Cruz, enkontru ho ekipa hosi WaterAid Timor-Leste (WATL), iha salaun enkontru edifísiu sentrál BTL, E.P Caicoli.
Objetivu husi enkontru ne’e, hodi rona perspetiva hosi BTL, E.P nian, oinsá impaktu alterasaun klimátika ne’e rasik iha sistema abastesimentu bee no rekursu bee, atu nune’e saida mak WATL bele apoia, liu-liu foku ba iha setór BESI nian,
“Ha’u hanoin iha vizita kortejia ida ne’e, WATL liuhosi ekipa rejionál ne’ebé hanesan espesialista ba iha alterasaun klimátika, tamba ne’e iha biban ne’e hanesan oportunidade ida, bele rona perspetiva hosi BTL oinsá impaktu alterasaun klimátika ne’e rasik iha sistema abastesimentu inklui mos rekursu bee. Tamba agora daudaun WATL diskute hodi dezenvolve hela planu estatejia ba tinan lima tuir mai, tamba ne’e hanesan biban ida oinsá mak atu aliña estratejia ida ne’e ho prioridade iha setór BESI, liu-liu hanesan BTL, E.P no ANAS, I.P ba iha tinan lima oin mai no hakarak atu rona mos dezafiu saida mak ita hasoru liu-liu iha setór BESI ne’e, saida mak ami bele apoia nudár ajénsia ne’ebé mak durante ne’e foku ba iha setór BESI”, dehan WASH and Climate Change Technical Lead, Ângelo Ximenes.
WASH and Climate Change Technical Lead hatete, durante iha enkontru ne’e, Ezekutivu BTL, E.P mós partilla informasaun lubuk ida ne’ebé mak WATL sei tau iha prioridade, hanesan jestaun iha rekursu bee, liu-liu ba iha impaktu hosi alterasaun klimátika, konserva bee no oinsá mak atu hasa’e konsiénsia hanesan mudansa ba hahalok sira, tamba WATL kontinua servisu hamutuk ho parseiru implementadór sira, tamba ne’e, ho informasaun ne’ebé mak WATL hetan, hodi tulun WATL oinsá ba futuru bele nafatin alkansa hamutuk ho parseiru sira, hodi atinji prioridade hirak ne’ebé mak iha, liu-liu iha setór BESI nian.
Perante iha enkontru ne’e, alende ko’alia kona-bá impaktu alterasaun klimátika ne’e, iha mós asuntu seluk hanesan sistema dadus kobertura BESI, ne’ebé hanesan dezafiu ida mak setór hasoru, sistema modeling ida ba iha alterasaun klimátika oinsá mak atu bele hetan análize ba iha inserteza klimátika ne’e no nia impaktu ba iha sistema BESI, tamba daudaun ne’e, udan monu rai la tuir tempu, dala ruma sedu no dala ruma tarde, maibé seidauk iha sistema baze ne’ebé mak apoia, hodi bele halo análize ba kestaun ida ne’e, atu nune’e bele foti asaun imediata.
Molok termina enkontru, BTL, E.P hato’o mós rekomendasaun balun ba WATL, atu oinsá bele apoia di’ak liu tan iha setór BESI, tamba iha ona rezultadu prátika ou servisu balun ne’ebé mak WATL ho parseiru sira realiza ona, iha munisípiu Liquiça no Manufahi, atu kontinua mantein no husu atu espanda liu tan ba iha munisípiu sira seluk no ikus liu WATL entrega mos sumáriu relatóriu ba BTL, E.P.
Share on Social Media:
