Ainaro, 13/12/2023, Vise-Prezidente Komisaun Ezekutiva BTL, E.P, ba Asuntu Sistema Bee Saneamentu no Drenagen, Sr. Gustavo da Cruz, akompaña kordenadór BTL, E.P Ainar oho ekipa, hamutuk ho parseria UNICEF iha Timor-Leste, Prezidente Autoridade Munisípiu Ainaro, Administradór Postu Administrativu Ainaro, Autoridade lokál, Komunidade sira, ofisiálmente inaugura sistema bee moos, ne’ebé lokaliza iha Suku Manu-Tasi, Postu Administrativu Ainaro.
Ho preokupasaun komunidade sira iha Manu-Tasi, ne’ebé difisil asesu ba bee moos, maka liu husi Autoridade Lokál, halo proposta hodi enkamina mai iha BTL, E.P iha fulan dezembru 2022, ho nune’e Ezekutiva BTL, E.P konsidera proposta ida ne’e, importante tebes, hodi bele tau atensaun lalais. Tamba ne’e BTL, E.P rasik husu apoia ba parseiru UNICEF iha Timor-Leste, hodi bele hadi’a sistema ezistente, ne’ebé la funsiona.
Relasiona ho pedidu husi BTL, E.P ne’e, parseria UNICEF konsege fo resposta pozitivu, nune’e UNICEF nia parte prontu atu bele apoia finanseiru, hodi hadi’a sistema bee refere, hodi bele fasilita komunidade sira, bele asesu hikas bee.
Nune’e UNICEF konsege apoia fundu hamutuk dollar amerikanu rihun hitu, atus lima hitu nulu resin rua, ho sentavus ualu nulu ($ 7.572,80), hodi mellora sistema bee moos, ne’ebé sistema dadaun ne’e komunidade sira asesu ona bee.
Iha serimónia inaugurasaun ne’e, Vise-Prezidente Komisaun Ezekutiva BTL, E.P, ba Asuntu Sistema Bee Saneamentu no Drenagen, husu ba komunidade no autoridade lokál sira, atu kuidade sistema bee, hodi bele garante nafatin sustentabilidade ba futuru.
Ezekutiva ne’e afirma, komunidade sira tenki iha konsiensia hodi tau matan ba sistema no labele halo pratíka halo ligasaun ilegál, nune’e labele afeta ba presaun bee. Alem de ne’e, husu mos ba abitante sira atu kontinua tau matan ba bee matan, hanesan proibidu hodi tesi ai no sunu rai, tamba asaun ida ne’e sei kontribui hodi halo rekursu bee iha rai okos.
Iha fatin hanesan Prezidente Autoridade Munisípiu Ainaro, Leovolgildo Amaral Marçal agredese ba parseria governu UNICEF no BTL, E.P, ne’ebé mellora ona sistema bee iha Suku Manu-Tasi, ne’ebé tinan barak la funsiona, maibé ho apoia ida ne’e, populasaun sira bele asesu ona bee moos.
Lider maxímu iha Munisípiu ne’e mos fó mensagen ba komunidade sira, atu bele kuida sistema no tau matan rasik ba bee ulun, nune’e sistema ida ne’e bele dura ba tempu naruk.
Iha sorin seluk, Ofisais Bee Saneamentu no Ijiene (BESI) Apolonia Asteria Barreto hatete, UNICEF nia papel maka tau matan matan ba labarik sira iha Timor-Leste no mos nasaun sira seluk, hodi bele hetan nutrisaun di’ak, moris protesaun ba labarik sira iha sosiedade. Nune’e mos labarik sira iha direitu atu asesu bee moos ho kualidade di’ak, hodi utiliza ba nesesidade, liu-liu hanesan iha eskola, hodi bele hetan nafatin ijiene.
Apolonia akresenta katak, liu husi servisu hamutuk entre BTL, E.P no UNICEF maka kordena ho autoridade lokál no komunidade sira, bele finaliza projetu bee moos ida ho susesu.
Projetu melloamentu ida ne’e, sei benefisia ba Suku Manu-tasi, uma kain hamutuk 529, ho nia populasaun rihun tolu, atus ida sia (3109).
Share on Social Media:
