Díli, 27/06/2025, Prezidente Komisaun Ezekutiva (KE) Bee Timor-Leste, Empreza Públika (BTL, E.P), Sr. Gustavo da Cruz enkontru ho WASH Specialist, Ariuntungalag Danielson no Ofisiál Bee, Saneamentu no Ijiéne Unicef nian, iha sala reuniaun Ezekutivu, BTL, E.P sentrál Caicoli.
Objetivu hosi enkontru ne’e, hodi deskute kona-bá próximu apoiu hosi parseiru Unicef nian, mai iha setór bee no saneamentu, liu-liu liga ba tanke rezervatóriu bee. Tanba ne’e, ohin, halo diskusaun no parte Unicef husu atu BTL, E.P atu bele prepara espesifikasaun tanke rezervatóriu bee nian. Relativamente ba pedidu ne’e, Ezekutivu hatete, BTL, E.P sei prepara espesifikasaun tanke ne’e, hafoin sei hato’o fila-fali ba Unicef, nune'e hodi halo prosesamentu ba produsaun.
Durante iha diskusaun ne’e, parte rua (BTL, E.P no Unicef) ko’alia mos kona-bá progresu instalasaun tanke bee unidade 25 ne’ebé antes ne’e, apoia hosi Governu China liuhosi Unicef ne’ebé entrega ona mai BTL, E.P. Praseiru Unicef husu atu aselera prosesu instalasaun tanke hirak ne’e.
Iha biban ne’e, Prezidente KE BTL, E.P informa mos ba parseiru Unicef katak, BTL, E.P mos simu ona karta hosi Ministériu Saúde (MS), relasiona ho preparativu sira, atu bele reativa programa fase liman ho sabaun. Tanba ne’e, MS husu BTL, E.P atu bele instala ou koloka fila-fali tanke bee iha pontu entrada sira, iha kapitál Díli, hanesan iha Tasi-Tolu, Casnafar, Becora inklui iha merkadu sira, atu nune’e komunidade sira bele fase liman, hodi prevene moras ne’ebé fó impaktu ba saúde públika. Ho nune'e, liuhosi apoiu hirak tanke hirak ne'e, tulun tebes BTL, E.P, atu responde ba pedidu MS nian.
Molok atu ensera diskusaun ne’e, lideransa máximu iha empreza públika ne’e, hodi BTL, E.P nia naran hato’o agradese wa’in ba inisiativa parseiru Unicef nian ne’ebé nafatin prontu, atu kontinua apoia iha setór bee no saneamentu.
Share on Social Media:
