𝐃𝐢́𝐥𝐢, 𝟏9 𝐌𝐚𝐫𝐬𝐮 𝟐𝟎𝟐𝟔. Bee Timor-Leste, Empreza Públika (BTL, E.P) selebra akordu ho 𝑀𝑖𝑙𝑙𝑒𝑛𝑛𝑖𝑢𝑚 𝐶ℎ𝑎𝑙𝑙𝑒𝑛𝑔𝑒 𝐴𝑐𝑐𝑜𝑢𝑛𝑡 Timor-Leste (MCA-TL), kona-bá transferénsia patrimóniu hosi MCA-TL mai BTL, E.P. Seremónia selebrasaun akordu ne’e realiza iha BTL, E.P sentrál Caicoli.
Akordu transferénsia ne’e, asina hosi Prezidente KE BTL, E.P, Gustavo da Cruz ho Diretór Ezekutivu MCA-TL, Embaixadór Constâncio da Conceição Pinto no akompaña hosi Diretora-Jerál Patrimóniu Estadu ne’ebé sai testemuña ba akordu refere nomos Prezidente Konsellu Administrasaun (Board President) MCA-TL, Reprezentante 𝑀𝑖𝑙𝑙𝑒𝑛𝑛𝑖𝑢𝑚 𝐶ℎ𝑎𝑙𝑙𝑒𝑛𝑔𝑒 𝐶𝑜𝑟𝑝𝑜𝑟𝑎𝑡𝑖𝑜𝑛-MCC iha TL, Vise-Prezidente KE BTL, E.P ba Asuntu Tékniku no Vise-Prezidente KE BTL, E.P ba Asuntu Korporativu, inklui Diretór, Jestór no Jestora hosi BTL, E.P no MCA-TL nian.
Prezidente Konsellu Administrasaun (Board President) MCA-TL, Hergui Luina Fernandes Alves konsidera, seremónia transferénsia 𝑎𝑠𝑠𝑒𝑡𝑠 ne’e, loloos labele atu selebra tanba seremónia triste, tanba loloos sai parseiru atu implementa projetu bee and saneamentu entre BTL, E.P ho MCA-TL, maibé labele realiza. Maske lakon fundus hosi MCC nian, maibé la’ós fim ba TL atu labele implementa, maibé ida ne’e hanesan pasu ida atu refleta hodi haree ba estudu sira (estudu viabilidade no DED) ne’ebé durante ne’e halo ona no bele sai mos referénsia atu haree kontinuasaun hosi implementasaun projetu nee ba interese TL nian. Ho nune’e hanesan Board, ohin mai akompaña Diretór Ezekutivu hodi bele entrega asset hirak ne’ebé durante ne’e sai MCA-TL ba iha BTL, E.P, atu bele utiliza hodi fasilita servisu BTL, E.P nian, nune’e bele serve povu timor.
Prezidente Konsellu Administrasaun MCA-TL dezeja atu BTL, E.P bele kontinua misaun ida ne’ebé mak pendente. Maske TL labele asesu fundus ho Kompaktu ne’e, maibé bele hetan fundus hosi Governu TL ou parseiru sira seluk, hodi implementa nafatin mehi boot ba kriasaun sistema saneamentu ne’ebé ba povu TL.
Diretór Ezekutivu MCA-TL, Embaixadór Constâncio da Conceição Pinto hatete seremónia transferénsia patrimóniu ne’e, hanesan momentu triste ida, tanba MCA-TL entrega asset ba BTL, E.P la kompletu. Tanba la konsege implementa projetu WWTP, sei karik implementa duni projetu ne’e, buat barak mak sei entrega ba BTL, E.P inklui Sentru Tratamentu Bee Fo’er nian, maibé ida ne’e la akontese. Tanba ne’e, MCA-TL deside hodi entrega 𝑎𝑠𝑠𝑒𝑡𝑠 balun mai BTL, E.P hodi fó kontinuidade ba programa ne’ebé mak iha relasaun ho saneamentu nian.
Prezidente KE BTL, E.P, Gustavo da Cruz, lori BTL, E.P nia naran agradese ba esforsu entre Governu TL ho EUA atu implementa projetu WWTP iha TL, liuhosi programa kompaktu MCC nian. No projetu refere importante tebes atu bele hadi’a kualidade moris populasaun nian, liu-liu iha kapitál Díli nomos atu bele reduz 𝑠𝑡𝑢𝑛𝑡𝑖𝑛𝑔, maibé infelizmente tenke taka/ensera tanba desizaun polítika EUA nian. Ho nune’e fasilidade hirak ne’ebé durante ne’e hodi apoia MCA-TL, ligadu ho servisu bee no saneamentu nian, presiza entrega ba BTL, E.P nudár na’in ba projetu.
Ligadu ho tranferénsia 𝑎𝑠𝑠𝑒𝑡𝑠 ne'e, Prezidente BTL, E.P hato’o agradese wa’in ba MCA-TL, tanba bele ajuda BTL, E.P hodi reduz gastu iha kompra ba ekipamentu no viatura sira. Alende ne’e, tranferénsia refere bele utiliza ba kontinuidade servisu bee no saneamentu nian.
Patrimóniu ne’ebé MCA-TL sei entrega ba BTL, E.P hanesan veíkulu, komputadór, laptop no mobiliáriu sira ne’ebé kompilla ba osan ho valór Dolla Amerikanu rihun 100-resin. Hafoin asina akordu ne’e, iha tempu besik sei halo transferénsia ba patrimóniu hirak ne’e.
Share on Social Media:
