Díli, 30/11/2022, I Vise-Prezidente Komisaun Ezekutiva (K.E) Bee Timor-Leste, Empreza Públika (BTL, E.P) Sr. Gustavo da Cruz, hetan entrevista hosi WaterAid Timor-Leste (WATL), kona-bá implementasaun programa Bee ba Fetó (Water for Women) iha Timor-Leste (TL). Entrevista ne’e realiza, iha I Vise-Prezidente nia knaar fatin, edifísiu BTL, E.P, Caicoli, Díli.
Objetivu hosi entrevista ne’e mak WATL hakarak rona no hatene mudansa ou impaktu pozitivu hosi implementasaun programa kona-bá Bee ba Fetó (Water for Women) ne’ebé mak WATL realiza ona durante tinan lima, iha Timor-Leste (TL) liuhosi kooperasaun ho parseiru sira seluk, liu-liu servisu fíziku ne’ebé implementa ona iha munisípiu Liquiça no Manufahi nomos advokasia ne’ebé hala’o iha nível nasionál iha setór Bee, Saneamentu no Ijiéne (BESI) no governu.
Hafoin entrevista Koordenadora ba Komunikasaun no Koñesimentu WaterAid Timor-Leste Joraida Pereira hatete, WATL apresia tebes no deside hala’o entrevista ho BTL, E.P, tanba durante ne’e, hahú kedas hosi tempu DGAS to’o mai BTL, E.P, parte rua ne’e (BTL, E.P & WATL) nafatin sai parseria ne’ebé di’ak, hodi realiza servisu sira ne’ebé liga ba iha setór bee, saneamentu no ijiéne. Alende ne’e, WATL mos hala’o entrevista ho parseiru sira seluk ne’ebé durante ne’e, iha koordenasaun servisu ne’ebé di’ak no besik liu ho WATL, hodi rona mos sira nia komentáriu kona-bá mudansa saida de’it, hafoin implementasaun programa Bee ba Feto (Water for Women) ne’e rasik.
Alende ne’e, liuhosi entrevista ne’e, WATL mos reflete katak, iha duni mudansa signifikativu, tanba iha buat lubuk ida mak realiza ou implementa ona, liuhosi programa Bee ba Feto ne’e rasik ne’ebé ho nia objetivu ida katak, “atu labele husik ema ida iha kotuk”, inklui promove programa asesibilidade ba infraestrutura sira
WATL kontente tanba ho implementasaun programa ne’e, bele konsidera katak komunidade iha área rurál bele hatene kle’an ona, kona-bá oinsá importánsia hosi asesu ba bee, saneamentu no ijiéne nomos ema barak ko’alia ona kona-bá asuntu igualdade jéneru no inkluzaun sosiál.
WATL sei kontinua programa refere, iha tinan oin (2023), ne’ebé sei foka liu ba programa BESI liga ho mudansa klimátika ho aproximasaun advokasia iha nível nasionál no sei espanda ba iha fatin seluk.
Share on Social Media:
