Viqueque, 05/01/2023, Tékniku Operadór (TO), Bee Timor-Leste, Empreza Públika (BTL, E.P) munisípiu Viqueque hahú prepara hodi halo manutensaun ba liña transmisaun bee, iha ponte Buanurak, aldeia Buanurak, ne’ebé lokaliza iha fronteira entre postu-administrativu Ossu no postu-administrativu Viqueque Villa, munisípiu Viqueque.
Iha imajen hatudu, tékniku sira sukat hela distánsia iha ponte foun Buanurak nian, hodi prepara atu instala kanu transmisaun bee ne’ebé daudaun ne’e ameasadu atu tohar ou monu, tanba tuir informasaun hosi terrenu katak, kanu transmisaun ne’ebé instala iha ponte tuan ne’e ameasadu atu monu, tanba kondisaun ponte mos grave, ho razaun ne’e, tékniku sira esforsu atu bele muda liña transmisaun refere, nune’e bele garante nafatin abastesimentu bee ba komunidade sira iha munisípiu Viqueque.
Koordenadór BTL, E.P Viqueque informa, kanu transmisaun refere, mak durante ne’e hodi fornese bee ba komunidade sira iha munisípiu Viqueque laran, nune’e la muda ou instala imediata sei difikulta fornesimentu bee ba abitante Viqueque tomak.
Hafoin sukat hotu, tékniku sira sei prepara no mobiliza materiál hodi tun ba terrenu, atu bele kontinua halo mudansa no instalasaun ba linña transmisaun ne’e.
Share on Social Media:
