Díli, 10/04/2025, Diretór O&M, Bee Timor-Leste Empreza Públika (BTL, E.P), akompaña hosi Ofisiál DAK, parte Legál, ho ekipa hamutuk ho reprezentante SEEAS nomos parseiru JICA, kontinua realiza atividade diseminasaun kona-bá Dekretu Lei no Diploma Ministeriál, ba abitante sira iha aldeia Fulsam, suku Bairo-Pité, postu-administrativu Dom Aleixo, munisípiu Díli.
Objetivu hosi sosializasaun ne’e, hodi partilla informasaun sira liga ba regulamentu ne’ebé abrigu iha Dekretu Lei nú. 41/2020 loron 25 fulan Setembru ne’ebé ko’alia kona-bá “Kriasaun Bee Timor-Leste, Empreza Públika (BTL, E.P), Dekretu Lei nú. 4/2004 loron 11 fulan Fevereiru, kona-bá “Aprova Rejime Fornesimentu Bee ba Konsumu Públiku”, nune’e mos Diploma Ministeriál nú. 1/2004 loron 11 fulan Fevereiru ne’ebé ko’alia kona-bá “Tabela Tarifária” no ikus liu Diploma Ministeriál nú. 1/2009 loron 5 fulan Outubru, kona-bá “Fiskalizasaun Sistema Abastesimentu Bee”, atu abitante sira bele entende didi’ak, molok BTL, E.P halo melloramentu ba sistema bee, iha aldeia Fulsam, suku Bairo-Pité.
Durante iha sosializasaun ne'e, autoridade lokál no abitante aldeia Fulsam konkorda, atu halo melloramentu iha sira-nia bairo no sira prontu hodi apoiu servisu melloramentu ne'e.
Hafoin realizasaun atividade diseminasaun ne'e, iha tempu badak ekipa BTL, E.P sei tun ba terrenu hodi halo survey no prepara materiál sira, nune'e hodi bele halo servisu melloramentu ba liña distribuisaun, desliga koneksaun ilegál sira nomos bomba elétrika/sanyo ne'ebé liga direta ba kanalizasaun públiku, hafoin sei halo fila-fali ligasaun foun no monta metru kontadór ba kliente uma kain ida-idak, nune'e komunidade hotu bele asesu bee hanesan nomos hodi kontribui reseitas liu hosi selu tarifa.
Partisipa iha atividade diseminasaun ne’e, Reprezentante PAM Díli, reprezentante Administradór PA Dom Aleixo, xefe aldeia Fulsam no populasaun aldeia Fulsam.
Share on Social Media:
