Díli,10/01/2023, Prezidente Komisaun Ezekutiva (K.E) Bee Timor-Leste, Empreza Públika (BTL, E.P) Eng. Carlos Peloi dos Reis asina kontratu ho kompañia tolu hanesan kompañiaTimorindo Unipessoal Lda, Quinta das Flores Unipessoal Lda no Kuapali Unipessoal Lda, kona-bá implementasaun projetu melloramentu sistema fornesimentu bee moos ba iha postu-administrativu Lacluta, munisípiu Viqueque, projetu konstrusaun sistema bee moos no projetu pakote supply & Installation of Prefabricated Liner Tank, ba postu-administrativu Maubara. Seremónia asina kontratu ne’e, realiza iha salaun enkontru, edifísiu sentrál BTL, E.P, Caicoli.
Iha entrevista Prezidente K.E BTL, E.P hatete selebrasaun kontratu ne’e, hodi kanaliza bee ba abitante sira, iha postu-administrativu Lacluta no Maubara.
“Ohin ita asina kontratu ho kompañia tolu hodi bele halo servisu kanalizasaun bee iha kapitál postu Lacluta no kapitál postu Maubara. Kada projetu iha fatin rua ne’e, ho nia durasaun fulan neen, ne’ebé sei benefisia ba ita nia komunidade sira ne’ebé hela iha kapitál postu rua refere”, dehan dehan Prezidente K.E BTL, E.P.
Prezidente BTL, E.P husu ba kompañia manan na’in sira, atu kumpri regras ne’ebé estabelese ona iha kontratu laran, katak implementasaun projetu fíziku tenke termina tuir tempu ne’ebé estabelese ona, maibé wainhira la kumpri regras ne’ebé parte rua konkorda ona, mak BTL, E.P sei fó sansaun ba kompañia sira, liuhosi aplika multa ba kompañia implementadór sira, wainhira laiha justifikasaun ne’ebé klaru no razoavel. Tanba ne’e, solisita ba kompañia sira atu koopera, hodi ezekuta servisu ho lalais tuir tempu ne’ebé iha no tenke garante mos kualidade projetu ne’e rasik, nune’e wainhira projetu finaliza bele fornese ona bee ba komunidade sira iha fatin rua ne’e.
Alende ne’e, atu labele prejudika projetu fíziku iha terrenu, Ezekutivu BTL, E.P mos husu ba autoridade lokál sira atu koopera hodi apoia BTL, E.P no kompañia manan na’in, hodi rezolve problema sosiál ne’ebé mak mosu iha terrenu, durante implementasaun obra fíziku iha terrenu, nune’e bele finaliza tuir termu kontratu ne'ebé estabelese ona.
Iha fatin hanesan, Administradór postu-administrativu Lacluta, agradese ba VIII Governu, tanba iha tinan 2023 ne’e, iha oportunidade hodi hetan projetu bee moos, ne’ebé sei benefisia ba komunidade sira iha Lacluta nomos Maubara.
Administradór Lacluta mos husu ba kompañia implementadór sira ne’ebé hetan oportunidade, atu ezekuta projetu refere ho di’ak, tanba servisu ne’ebé halo la’os sei benefisia ba ema estranjeiru, maibé sei benefisia ba populasaun iha TL liu-liu Lacluta no Maubara mos, tanba ne’e, kompañia tenke iha integridade no iha unidade ho autoridade lokál sira iha postu refere, hodi bele finaliza projetu ne’e. Líder máximu postu-administrativu Lacluta solisita ba kompañia implementadór atu labele abandona projetu refere, wainhira projetu ne’e remata ou lae, tenke tur hamutuk no komunika ba malu, hodi hato’o ba BTL, E.P, tanba ne’e kompañia sira tenke iha onestidade no lealdade atu halo servisu hodi populasaun sira.
Iha biban ne’e, Administradór postu-administrativu Maubara agradese no husu ba kompañia ne’ebé manan projetu ne’e, katak servisu ba rai Timor, tanba ne’e tenke servisu ho laran no fuan, nune’e populasaun sira bele hetan benefísiu ne’ebé mak di’ak hosi projetu ne’e no importante liu mak kooperasaun servisu no kria liña koordenasaun ne’ebé di’ak entre parte hotu, atu nune’e labele akontese problema ruma ne’ebé fó impaktu negative ou impede obra refere.
Entretantu projetu melloramentu sistema bee moos ne’e, sei implementa hosi kompañia Tomorindo Unipessoal Lda, iha postu-administrativu Lacluta, munisípiu Viqueque, ne’ebé sei kobre ba suku Dilor no suku Laline inklui postu-administrativu Lacluta Villa. Sistema bee moos ne’e, sei benefisia ba populasaun 4158 inklui postu saúde, eskola no igreja. Nune’e mos sistema bee mos ne’e, sei transforma ba sistema urbana, iha ne’ebé sei instala mos metru kontadór unidade ba benefisiáriu uma kain 693.
Enkuantu projetu melloramentu sistema bee moos ne’e, sei gasta orsamentu hamutuk $ 615,379.36. No fontes bee ne’ebé kanaliza ba postu refere mak bee matan Surik Lulik ho nia kapasidade 10 litru por segundu.
Alende ne’e, kompañia Quinta das Flores Unipessoal Lda sei kaer obra kona-bá projetu konstrusaun sistema bee moos ne’ebé sei implementa iha postu-administrativu Maubara, munisípiu Liquiça, sei gasta orsamentu $ 354,894.16 ho durasaun fulan neen no fontes bee matan perfurasaun ho kapasidade 18 Lps, maibé hala’o esplorasaun 9 Lps. No sistema bee moos ne’e, sei monta mos metru kontadór unidade 372 ba uma kain sira no sei benefisia ba populasaun hamutuk 2232, alende ne’e, sei fornee mos bee ba postu saúde, igreja no eskola.
Nune’e mos, projetu pakote supply & installation prefabricated liner tank ba postu-administrativu Maubara, munisípiu Liquiça nian ho kustu hamutuk $ 196,970.58, obra ne’e sei ezekuta hosi kompañia implementadór Kuapali Unipessoal, Lda ho durasaun tempu fulan neen.
Share on Social Media:
