Díli, 09/05/2023, Ekipa BTL, EP kompostu hosi Departamentu Aprovizionamentu no Diresaun Enjeñaria no Investimentu (DEI) realiza prebid meeting ho kompañia sira, kona-bá projetu Melloramentu Sistema Fornesimentu Bee Moos no projetu Pakote Supply & Installation Liner Tank, ba iha postu-administrativu Balibo, munisípiu Bobonaro. Prebid meeting ne’e realiza iha salaun enkontru, edifísiu sentrál BTL, E.P, Caicoli.
Prebid meeting ne’e, hodi ko’alia kona-bá atividade ba prosesu kontinuasaun hosi site visit ne’ebé antes ne’e ekipa DEI ho kompañia sira hala’o ona iha terrenu no faze sira tuir mai, molok implementa projetu hirak ne’e, iha Balibo.
Orsamentu ne'ebé prevé ba projetu Melloramentu Sistema Fornesimentu Bee Moos ne'e $ 705,947.41, enkuantu fundus ba projetu Pakote Supply & Installation Prefabricated Liner Tank ho montante $ 74,753.74. Enkuantu sistema bee refere, sei transforma ba sistema urbana, iha ne’ebé sei instala ou monta mos metru kontadór ba benefisiáriu sira.
Antes ne’e, iha loron 02 to’o 03 fulan maiu tinan ne’e, ekipa DEI lori ona kompañia sira ne’ebé partisipa iha prosesu tenderizasaun ne’e, bá haree direta fatin projetu konstrusaun sistema bee, fatin instalasaun kanu transmisaun no distribuisaun nomos lokál hodi hatuur ou instala tanke rezervatóriu sira, iha postu-administrativu Balibo, atu nune’e wainhira kompañia ne’ebé mak manan tender ba projetu refere, sira bele hatene ona fatin hirak ne’e.
Prebid meeting no site visit ne’e, hanesan mandatória iha dokumentu konkursu ba projetu konstrusaun no melloramentu sistema fornesimentu bee moos inklui supply & instalasaun materiál sira.
Share on Social Media:
