Díli, 03/05/2023, Ekipa BTL, EP kompostu hosi Departamentu Aprovizionamentu no Diresaun Enjeñaria no Investimentu (DEI) realiza prebid meeting ho kompañia sira, kona-bá projetu Konstrusaun Fornesimentu Sistema Bee Moos no projetu Pakote Supply & Installation Liner Tank, ba iha postu-administrativu Uatucarbau, munisípiu Viqueque. Prebid meeting ne’e realiza iha salaun enkontru, edifísiu sentrál BTL, E.P, Caicoli.
Prebid meeting ne’e, hodi ko’alia kona-bá atividade ba prosesu kontinuasaun hosi site visit ne’ebé antes ne’e ekipa DEI ho kompañia sira hala’o ona iha terrenu no faze sira tuir mai, molok implementa projetu hirak ne’e, iha Uatucarbau.
Projetu Konstrusaun Fornesimentu Sistema Bee Moos no projetu Pakote Supply & Installation Liner Tank ne’e, sei benefisia ba komunidade uma kain 983, ho totál populasaun hamutuk 5.282. Enkuantu sistema bee refere, sei transforma ba sistema urbana, iha ne’ebé sei instala ou monta mos metru kontadór ba benefisiáriu sira.
Planu ba implementasaun projetu Konstrusaun Fornesimentu Sistema Bee Moos ne'e sei kobre iha postu-administrativu Uatucarbau, liu-liu ba suku rua hanesan, suku Irabin de Baixo no suku Uani-Uma ho nia aldeia 12. Projetu ne'e mos, sei instala tanke rezervatóriu foun tolu no tanke hirak ne'e ho medida hodi metru kúbiki 70 (70m3), metru kúbiki 360 (360m3) no ida seluk ho medida (250m3) inklui ho ema melloramentu ba tanke ezistente ho medida metru kúbiku 85 (85m³).
Orsamentu ne'ebé prevé ba projetu Konstrusaun Fornesimentu Sistema Bee Moos ne'e $ 1, 375,804.69, enkuantu fundus ba projetu Pakote Supply & Installation Prefabricated Liner Tank ho montante $ 211,079.15
Antes ne’e, iha loron 27 to’o 28 fulan abril tinan ne’e, ekipa DEI lori ona kompañia sira ne’ebé partisipa iha prosesu tenderizasaun ne’e, bá haree direta fatin projetu konstrusaun sistema bee, fatin instalasaun kanu transmisaun no distribuisaun nomos lokál hodi hatuur ou instala tanke rezervatóriu sira, iha postu-administrativu Uatucarbau, atu nune’e wainhira kompañia ne’ebé mak manan tender ba projetu refere, sira bele hatene ona fatin hirak ne’e.
Prebid meeting no site visit ne’e hanesan mandatória iha dokumentu konkursu ba projetu konstrusaun no melloramentu sistema fornesimentu bee moos inklui supply & instalasaun materiál sira.
Share on Social Media:
