Díli, 10/11/2022, Hafoin ekipa hosi Diresaun Enjeñaria no Investimentu (D.E.I) ho kompañia sira bá hala’o site visit, durante loron rua, iha munisípiu Manufahi, ohin ekipa téknika hosi Aprovizionamentu hamutuk ho tékniku hosi D.E.I, Bee Timor-Leste, Empreza Públika (BTL, E.P) hala’o prebid meeting ho kompañia sira, iha salaun enkontru, edifísiu sentrál BTL, E.P, Caicoli.
Prebid meeting ne’e hodi ko’alia kona-bá prosesu kontinuasaun hosi site visit nian no faze sira tuir mai, ligadu ho projetu Projetu Supply and Installation of Prefabricated Liner Tanks no Projetu Konstrusaun Sistema Bee Moos, ne’ebé sei implementa ba iha postu-administrativu Fatuberlihu, munisípiu Manufahi.
Atividade site visit no prebid meeting ne’e, hanesan rekezitu mandatória ida iha dokumentu konkursu ba projetu konstrusaun no melloramentu sira, tamba ne’e kompañia sira tenke partisipa iha faze hirak ne’e.
Enkuantu atividade prebid meeting ohin nian ba projetu tolu hanesan, Projetu Supply and Installation of Prefabricated Liner Tanks, ba P.A Fatuberlihu, munisípiu Manufahi, Projetu Konstrusaun Sistema Bee Moos, iha P.A Fatuberlihu, munisípiu Manufahi-01 no Projetu Konstrusaun Sistema Bee Moos, iha P.A Fatuberlihu, munisípiu Manufahi-02.
Entretantu projetu hirak ne’e, sei benefisia ba komunidade sira, iha suku tolu hanesan suku Klakuk, Fatukahi no Kaikasa, ne’ebé ho uma kain 759 no populasaun hamutuk 4554, postu-administrativu Fatuberlihu, munisípiu Manufahi.
Share on Social Media:
