Díli, 16/10/2025. Prezidente Komisaun Ezekutiva (KE) Bee Timor-Leste, Empreza Públika (BTL, E.P), Gustavo da Cruz partisipa iha Semináriu Nasionál kona-bá Panorama Orsamentál Tinan 2026 nian, ne’ebé realiza iha salaun auditóriu Kay Rala Xanana Gusmão, Ministériu Finansas, Aitarak-Laran, Díli.
Semináriu nasionál ne’e sai ona momentu importante, iha prosesu orsamentál ne’ebé realiza kada tinan, hodi fó oportunidade ba diálogu konstrutivu entre PN, Governu, instituisaun hotu-hotu, parseiru internasionál no sosiedade sivil.
Semináriu nasionál ne'e sei hala'o durante loron rua ho objetivu prinsipál mak reforsa transparánsia, responsabilidade ne’ebé rigór, iha sesaun finansas públika atu garante katak desizaun orsamentál hotu-hotu bele kontribui ba dezenvolvimentu sustentavel tuir planu estratéjiku desenvolvimentu nasionál 2011-2030, programa IX governu konstitusionál ba tinan lima, planu asaun anuál no orsamentu anuál Estadu nian ba moris di’ak povu no nasaun Timor-Leste (TL).
Oramentu Jerál Estadu mak instrumentu prinsipál polítika, ekonómia no sosiál Estadu nian no Semináriu ida ne’e mos fó espasu atu partilla no análiza prioridade, dezafiu no metas ne’ebé propoin iha OJE tinan 2026.
Partisipa iha semináriu nasionál ne’e, membru governu, Prezidente Parlamentu Nasionál no membru Parlamentu Nasionál, Prezidente Tribunál Rekursu, Grupu Banku Mundiál TL, ONG no partisipa relevante sira seluk.
Share on Social Media:
