Díli, 11/12/2025. Prezidente Komisaun Ezekutiva (KE) Bee Timor-Leste, Empreza Públika (BTL, E.P), Gustavo da Cruz, partisipa iha seremónia asinatura akordu troka nota entre Governu Timor-Leste (TL), liuhosi Ministériu Negósiu Estranjeiru no Kooperasaun (MNEK) ho Governu Japaun, liuhosi Embaixada Japaun iha TL, ba Programa Dezenvolvimentu Ekonómiku no Sosiál, kona-bá projetu apoia ekipamentu pezadu ba Institutu Jestaun Ekipamentu no Apoiu Dezenvolvimentu Infraestrutura, Institutu Públiku (IGEADI, I.P, sigla portugés), ho fundu millaun $3. Selebrasaun akordu ne’e, realiza iha salaun Nobre, MNEK, Praia dos Coqueiros, Díli.
Akordu ne’e, ofisialmente asina hosi Ministru Negósiu Estranjeiru no Kooperasaun (MNEK), Bendito Freitas ho Embaixadór Japaun iha TL, Tetsuya Kimura no akompaña hosi Vise-Ministru Infraestrutura (VMI), Júlio do Carmo, parseiru JICA, parte MOP, BTL, E.P, IGEADI, I.P no entidade relevante sira seluk.
Vise-Ministru Infraestrutura, lori Governu TL nia naran, hato’o apresiasaun kle’an ba Governu no povu Japaun nia apoia tomak mai TL, liuhosi nia Embaixada Japaun no JICA iha TL, liu-liu ba fundu ne’ebé ho valór boot, hodi sosa ekipamentu pezadu sira, atu bele tulun prosesu dezenvolvimentu infraestrutura iha TL. Apoiu ne’e mos, sai forsa ida ba traballadór sira, hodi asegura dalan ne’ebé seguru ba populasaun sira nomos atu responde ba situasaun emejénsia sira, iha territóriu nasionál.
Share on Social Media:
.jpg)
