Díli, 13/04/2023, Vise-Prezidente ba Asuntu Bee, Saneamentu no Drenajen, Bee Timor-Leste, Empreza Públika (BTL, E.P), Sr. Gustavo da Cruz, partisipa iha resesaun bem-vindu ba reprezentante hosi Millennium Challenge Corporation (MCC) nian mai Timor-Leste, hanesan Country representative MCC, Gretchen Goodhart ho nia Adjuntu John Crippen. Seremónia resesaun ne’e, organiza hosi MPCM no CDT-TL, iha otél Novo Turismo.
Eventu ne’e, hodi simu ou fó bemvindu ba reprezentante MCC nian mai TL, tanba ida ne’e, hanesan faze ikus, hosi faze preparativu sira, molok hahú iha faze implementasaun nian, nune’e iha loron 18 fulan abril ne’e, sei iha reuniaun dahuluk ho membru Konsellu Administrasaun Millennium Challenge Account (MCA) nian. Ho reunaun dahuluk ne’e, hodi marka ona inisiu hosi faze implementasaun ba akordu kompaktu MCC.
Enkuantu antes ne’e, iha tinan 2022 governu TL asina ona akordu kooperasaun ho Ajénsia Governamentál Amerikana Millennium Challenge Corporation (MCC) ho durasaun tinan lima, ho totál fundus Dolár Amerikanu millaun 484, iha ne’ebé sei foku liu ba projetu esensiál rua, hanesan iha setór Bee, saneamentu, no drenajen nomos iha área edukasaun no formasaun nian.
Eventu resesaun onra ne’e, partisipa hosi membru governu, diretór-jerál no nasionál hosi ministériu relevante sira, BTL, E.P rasik, ANAS, I.P, ANLA, I.P, sosiedade sivil,parseiru dezenvolvimentu no konvidadu sira seluk.
Share on Social Media:
