Díli, 16/09/2022, Diretór Diresaun Enjeñaria no Investimentu (D.E.I) Bee Timor-Leste, Empreza Públika (BTL, E.P), Sr. Aleixo ho ekipa, reprezenta BTL, E.P partisipa iha seremónia lansamentu ba dokumentu video kona-bá “Istória Susesu Bee Moos, iha Sistema Bee Mameloa II suku Luidahar, munisípiu Liquiça, Sistema Darema, suku Letefoho no Sistema B ee Fatuk Maromak suku Holarua, munisípiu Manufahi. Seremónia lansamentu video ne’e, realiza hosi Yayasan Hak, iha Farol, Díli.
Objetivu hosi lansamentu ne’e, hodi hatudu ba komunidade sira hosi fatin seluk, oinsá atu utiliza no asegura sistema bee ho di’ak, atu komunidade sira bele uza ba nesesidade lor-loron nian, ba tempu ne’ebé naruk.
Perante seremónia lansamentu ne’e, Prezidente ANAS, I.P, Sr. Domingos Pinto, iha nia intervensaun hatete programa ne’e interesante tebes tamba iha envolvimentu hosi GMF iha nível suku ne’ebé kontribui ona, oinsá atu bele uza rekursu bee no mantein asegura sistema bee ne’e rasik ba nesesidade komum nian.
Iha biban ne’e, BTL, E.P hato'o mos apresiasaun ba Yayansan Hak ne’ebé hetan apoia hosi WaterAid, hodi bele halo auditória sosiál ida ne’ebé di’ak ba GMF nia servisu no sai modelu ida, atu bele duplika ba sistema rurál nian. Alende ne’e, BTL, E.P klarifika mos ba sosiedade sivil sira ne’ebé partisipa iha seremónia ne’e katak, bee ba komunidade la’ós BTL, E.P nia responsabilidade de’it, maibé parte hotu ne’ebé servisu iha área bee ne’e nia responsabilidade.
Alende ne’e, D.E.I mos konfirma katak dadaun ne’e, BTL, E.P sei foku liu ba iha Postu-Adminitrativu hamutuk 65 inlui postu-administrativu foun rua, nune’e hamutuk postu-administrativu 67 no hosi postu-administrativu 67 ne’e, postu-administrativu 44 mak BTL, E.P halo ona dezeñu detalladu no postu-administrativu 16 seluk mak BTL, E.P sedauk halo levantamentu dadus ou survey, maibé fatin sira seluk daudaun ne’e, iha ona prosesu, liu-liu iha faze Aprovizionamentu no faze implementasaun, hein katak, iha tinan oin, bele implementa hotu ba Postu-Adminitrativu sira.
D.E.I akresenta, wainhira iha Postu-Adminitrativu sira finaliza ona, BTL, E.P sei kontinua ba suku no aldeia sira, tamba parte rurál BTL, E.P iha mos parseiru lubuk ida, hodi hala’o aktividade sira kona-bá bee moos nian.
Entidade hirak ne’ebé partisipa iha lansamentu ne’e mak, Prezidente ANAS, I.P, ekipa BTL, E.P rasik, Diretora CARE International, Country Director WaterAid, Xefe Suku Kampung Alor, Xefe Suku Villa-Verde no Sosiedade Sivil.
Share on Social Media:
