Manatuto, 03/09/2024. Vise-Prezidente Komisaun Ezekutiva (KE) Bee Timor-Leste, Empreza Públika (BTL, E.P) ba Asuntu Sistema Bee, Saneamentu no Drenajen Sr. Gustavo da Cruz ho PMU MOP/BTL, E.P, akompaña S.E Ministru Obras Públikas (MOP), Sr. Samuel Marçal ho ekipa partisipa iha seremónia Lansamentu Fatuk Dahuluk ba Reabilitasaun Projetu Estrada, iha postu-administrativu Laclubar, munisípiu Manatuto. No projetu ne’e, lansa direta hosi Ministru Obras Públikas.
Ministru Obras Públikas liuhosi nia diskursu hatete, Timor-Leste ukun-aan tinan liu ona tinan 25, iha fatin balun asesu ona estrada ne'ebé di'ak, eletridade, bee moos no iha ona eskola, maibé iha fatin seluk seidauk asesu, nune'e Governu nafatin esforsu, la'o neneik tuir Estadu ou Governu nia kbiit. Maibé husu ba povu hotu-hotu katak labele lakon esperansa tanba Timor sei sai di'ak iha loron ikus
MOP lori Primeiru-Ministru (PM) Kay Rala Xanana Gusmão nia naran hato'o parabéns ba povu iha Laclubar, tanba bele hetan oportunidade, nune'e ohin, bele lansa ou hatur ona fatuk ba estrada iha Laclubar, la'os ou la signifika katak povu Laclubar la prioridade, maibé halo tuir planu no kbiik Governu nian.
MOP konsidera estrada mak sai ran ba movimentu ekonómika povu nian, tanba ne'e, tenke hahú hadi'a estrada. Alen de ne'e, MOP mos garante katak, estrada ida ne'e, hafoin tinan ida ho balun bele entrega ona ba povu Laclubar, maibé husu ba Autoridade Munisípiu, Postu-Administrativu Laclubar, lideransa suku no aldeia liu-liu ba joven sira inklui komunidade Laclubar, atu koopera/kolabora, akompaña ba kompañia implementadór no labele halo intervensaun ou impedimentu ba projetu refere.
Iha ámbitu serimónia lansamentu ne’e, Ministru Obras Públikas informa katak, MOP lori mos parte BTL, E.P no EDTL, E.P hodi partisipa iha seremónia ne'e, atu empreza rua ne'e bele haree direta kestaun sira ne'ebé ligadu ho bee moos no eletrisidade, atu nune'e iha tinan haat nia laran, bele halo intervensaun ba setór rua ne'e.
Projetu Reabilitasaun Estrada PA Laclubar ne’e, ezekuta hosi kompañia R.D Interior Junior Construction (Philippines) in JV With Sino Road and Bridge Group Co.Ltd (Cina) ho totál kustu $ 5,190,492.29. Enkuantu durasaun tempu ba projetu ne’e, loron 365 ho nia distánsia kilómetru 10 (10km).
Partisipa iha seremónia lansamentu ne'e mak reprezentante PAM Manatuto, MOP, BTL, E.P rasik, JICA, kompañia implementadór, lideransa suku no aldeia, parte seguransa PNTL Munisípiu Manatuto no Postu Laclubar, Igreja no populasaun Laclubar.
Share on Social Media:
