Bobonaro, 04/07/2024. Vise-Prezidente Komisaun Ezekutiva (KE) Bee Timor-Leste, Empreza Públika (BTL, E.P) ba Asuntu Sistema Bee, Saneamentu no Drenajen Sr. Gustavo da Cruz akompaña hosi Koordenadór BTL, E.P munisípiu Bobonaro, partisipa seremónia Lansamentu Fatuk Dahuluk Reabilitasaun Estrada Munisipál Pakote II: Sesaun Maliana Villa, Estrada Lokál Faze 1 (28km) no sosializasaun reabilitasaun Estrada Urbana Maliana (Pakote 1,2), ne’ebé realiza iha postu-administrativu Maliana Villa, munisípiu Bobonaro. No Projetu ne’e lansa direta hosi Ministru Obras Públikas (MOP), Sr. Samuel Marçal.
Iha intervensaun, Ministru Obras Públikas husu ba PAM, Administradór, lideransa suku no aldeia sira, joven no komunidade Maliana atu koopera no labele halo intervensaun ou impedimentu ba projetu refere, atu nune'e kompañia implementadór bele halo servisu no bele aselera lalais obra fíziku, hodi nune’e bele finaliza iha tinan oin.
Iha ámbitu serimónia lansamentu ne’e, Ministru Obras Públikas konvida mos partisipante sira, liu-liu Autoridade Bobonaro, postu Maliana, lia na’in, parte igreja no PNTL inklui Maliana oan sira, hodi sai sasin ba asinatura kontratu kona-bá projetu reabilitasaun estrada Maliana nian.
Projetu Reabilitasaun Estrada Urbana Maliana pakote II ne’e, ezekuta hosi kompañia PT. Bina Mitra Indosejahtera, R.P no supervizaun hosi Wan Husin & Liner Engineering ho totál kustu millaun $ 2. Enkuantu durasaun tempu ba projetu ne’e, loron 540 (01 maiu 2024-23 outubru 2025) ho nia distánsia kilómetru 28 (28km).
Partisipa iha seremónia lansamentu ne'e mak Ministru Transporte no Telekomunikasaun, membru Parlamentu Nasionál (PN), SEEAS, PAM Bobonaro, Autoridade Postu-administrativu Maliana Villa, MOP, BTL, E.P rasik, lideransa suku no aldeia, parte seguransa PNTL Munisípiu Bobonaro, Igreja no komunidade Maliana Villa.
Share on Social Media:
