Díli, 18/10/2024. Vise-Prezidente Komisaun Ezekutiva (KE) Bee Timor-Leste Empreza Públika (BTL, E.P) ba Asuntu Sistema Bee, Saneamentu no Drenajen, Sr. Gustavo da Cruz akompaña hosi Diretór Operasaun no Manutensaun (DOM), partisipa iha komemorasaun Loron Aihan Mundiál tinan 2024, ho tema internasionál “Direitu ba aihan ba moris no futuru ne’ebé di’ak liu. Labele husik ema ida hosi kotuk (Right to Foods for a Better Life and a Better Future. Leave no one behind) no Timor-Leste (TL) opta tema “Asegura inkluzivamente Timor-oan nia Direitu ba Aihan Nutritivu ba Timor-Leste ida ne’ebé Prósperu”. Eventu ne’e rasik, realiza iha salaun enkontru Xanana Gusmão, Ministériu Finansas, Aitarak-Laran, Díli.
Komemorasaun Loron Aihan Mundiál ne’e, abertura hosi Vise-Primeiru-Ministru no Ministru Koordenadór Asuntu Sosiál no Prezidente CONSSAN-TL, Eng. Mariano Assanami Sabibo, ho objetivu atu destaka sensibilizasaun iha nível globál, rejionál no nasionál, atu hakotu hamlaha no garante katak individu sira hotu iha asesu ba aihan nutritivu nomos atu konsiensializa ba dieta saudável no promove asaun kontra desnutrisaun no seguransa aihan.
Iha diskursu Vise-Primeiru-Ministru no Ministru Koordenadór Asuntu Sosiál no Prezidente CONSSAN-TL hatete, atu atinji metas ba reduz má nutrisaun no inseguransa aihan, parte hotu tenke servisu maka’as, reforsa prioridade sira ne’ebé Governu define ona, reforsa parseria ho parte interesada/stakeholders sira, implementa solusaun inovativa ne’ebé servisu hamutuk ho akadémiku sira, atu tulun agrikultór sira hasa’e produsaun nomos presiza servisu hamutuk atu haree komplexidade fatór sira ne’ebé implika ba nutrisaun no seguransa aihan.
Iha ámbitu komemorasaun Loron Aihan Mundiál ne’e, Ministru Koordenadór Asuntu Sosiál no Prezidente CONSSAN-TL lansa mos múzika nutrisaun nian no iha mos sesaun semináriu. Partisipa iha eventu ne’e, membru governu, PN, parseiru internasionál sira, sosidedade sivil nomos konvidadu relevante sira seluk.
Share on Social Media:
