Díli, 13/12/2022, Prezidente Komisaun Ezekutiva (KE) Bee Timor-Leste, Empreza Públika (BTL, E.P), Eng. Carlos Peloi dos Reis no I Vise-Prezidente KE BTL, E.P Sr. Gustavo da Cruz, hamutuk ho Ministru Obras Públikas (MOP), S.E Eng. Abel Pires da Silva, akompaña hosi Diretór Diresaun Enjeñaria no Investimentu (DEI) no Diretór Diresaun Operasionál no Manutensaun (DOM) partisipa iha 2nd Joint Coordination Committee (JCC) kona-bá ‘’Project for Improvement of Water Supply Management of BTL, E.P’’. No JCC Meeting ne’e frasik, realiza iha salaun enkontru, otél JL Villa, Fatuhada.
Objetivu hosi 2nd Joint Coordination Committee (JCC) meeting ne’e, hodi halo koordenasaun servisu entre Governu Japaun no Governu Timor-Leste (TL), liu-liu iha setór bee nian. Alende ne’e mos hodi atualiza ou relata progresu servisu ne’ebé parseiru JICA apoia ona mai BTL, E.P, liu-liu kooperasaun servisu entre BTL, E.P no JICA ne’ebé durante ne’e, realiza ona, nomos aprezentasaun planu servisu ba futuru nian, ne’ebé parte rua (JICA no BTL, E.P) sei realiza iha tinan 2023 mai.
Alende ne’e, hosi JCC Meeting ne’e, atu koordena oinsá bele halo jestaun ne’ebé di’ak liu tan ba setór bee, nune’e iha futuru ema hot-hotu bele asesu ba bee moos, nune’e mos bele reduz ligasaun ilegál no bomba elétrika, hasa’e ou maximiza númeru pagamentu ba tarifa bee moos nian.
Iha 2nd JCC meeting ne’e, abertura direta hosi Ministru Obras Públikas (MOP), S.E Eng. Abel Pires da Silva, iha intervensaun S.E Ministru MOP hatete, servisu hot-hotu iha Ministériu Obras Públikas (MOP) todan, maibé todan liu mak servisu kanalizasaun sistema bee moos, tanba populasaun barak mak hela la tuir sirkulasaun bee, katak populasaun balun hela iha foho leten, nune’e presiza esforsu makaas hodi kanaliza bee ba fatin ne’ebé aas, tanba ne’e, hanesan Ministériu ne’ebé BTL, E.P tutela ba, sei la husik BTL, E.P hala’o mesak servisu todan ne’e, Ministru nafatin prontu apoia BTL, E.P, atu bele realiza servisu refere.
“Dalabarak ha’u hato’o ba prezidente BTL, E.P katak, servisu Obras Públikas ne’e todan, maibé ida todan liu mak bee. Estrada ita bele halo dezeñu no bele implementa, eletrisidade ita bele halo produsaun iha fatin ida ou rua, restu ou área seluk bele distribui de’it, depois mak haree manutensaun, maibé bee difísil. Tanba sá bee difísil, tanba fatin kiik ida, maibé ninia fonte tenke iha ne’ebá no aat/piór ou difísil liu tan, maioria ita nia populasaun sira hela iha foho leten, tanba bee servisu tuir forsa gravidade, bee tenke halai ka sulin ou sirkula tun ba área kle’an ou mai kraik, tanba ne’e, servisu boot ne’ebé halo mak tenke lori ou kanaliza bee sa’e ba populasaun sira ne’ebé hela iha foho leten, iha territóriu nasionál, ida ne’e servisu todan ida. Ho nune’e ha’u hamutuk ho ita boot sira, atu oinsá bele servisu hadi’a di’ak liu tan esforsu todan boot ida ne’e”, dehan S.E Ministru MOP.
S.E Ministru MOP akresenta, atu mellora asesu bee moos, tenke foku ba servisu fíziku sira, hanesan hadi’a instalasaun, tratamentu no distribuisaun bee, felizmente servisu hirak ne’e la’o duni, hanesan iha semana ida ou rua liu ba, Konsellu Ministru (KM) aprova ona rezultadu tender ba konsultór kona-bá melloramentu sistema bee mos, iha kapitál munisípiu Viqueque, Lautém no Manufahi no ida ne’e, husu atu konsultór sira apoia hodi prepara dokumentu sira ba tender nian, oinsá bele hakat ba konstrusaun fíziku nian kona-bá projetu bee moos refere, ida ne’e pasu ida ne’ebé di’ak tebes. Ministru sita mos kona-bá projetu sira seluk ne’ebé apoia fundus gratuíta hosi MCC nomos fundus empréstimu hosi Banku Mundiál no ADB.
Iha intervensaun ne’e, S.E Ministru Abel mos agradese ba JICA nia planu programa ne’ebé atu hadi’a Customer Service ou atendimentu ba kliente, sistema monitorizasaun, distribuisaun bee moos no tratamentu bee. Ministru mensiona mos ekipa péritu JICA nian ne’ebé mai ona TL, iha ne’ebé sira sei esforsu atu apoia BTL, E.P, hodi kria projetu pilotu ida, oinsá atu fornese bee moos durante oras 24, hein katak esforsu ida ne’e bele realiza nomos ida seluk mak sistema pagamentu tarifa bee liuhosi online.
Iha JCC Meeting ba daruak ne’e, iha mos aprezentasaun hosi JICA Expert Team no DOM BTL, E.P kona-bá Progress of the Project, iha pontu sira ou output ida to’o haat hanesan Overall Project Progress, Project Monitoring, Human Resource Development, Customer Service, Performance Monitoring no Distribution Management, hafoin aprezentasaun fó mos biban ba partisipante sira hodi hato’o perguntas, sujestaun no rekomendasaun ruma relasiona ho aprezentasaun ba asuntu ne’ebé mensiona iha leten. Ho nune’e, iha mos sujestaun no rekomendasaun balun ne’ebé mak hato’o hosi parseiru sira ne’ebé partisipa iha JCC Meeting ne’e, oinsá bele hadi’a servisu ne’ebé presta ona, nune’e bele hadi’a di’ak liu tan iha futuru.
Molok termina JCC Meeting ne’e, Prezidente KE BTL, E.P no I Vise-Prezidente KE BTL, E.P hato’o mos feedback balun liga ba aprezentasaun. Alende ne’e, Prezidente KE BTL, E.P hatete, bazeia ba aprezentasaun ne’e katak, servisu hotu-hotu ne’ebé BTL, E.P ho parseiru JICA realiza ona, hanesan esforsu ida ne’ebé hodi kria fondasi ba sistema ida ne’ebé di’ak liu, ne’ebé BTL, E.P sei halo, liuhosi apoiu hosi Banku Mundiál no ADB. BTL, E.P rekoñese kondisaun sistema bee agora nian grave, tanba ne’e, tenke halo esforsu hodi hadi’a oitoan-oitoan atu bele jere bee ho di’ak ba komunidade sira. No BTL, E.P hamutuk ho parseiru sira mos la hakamtek iha fatin, maibé nafatin esforsu hodi hadi’a di’ak liu tan sistema bee iha TL.
Ezekutivu BTL, E.P mos agradese tebes ba apoia tomak hosi parseiru sira, hanesan JICA, Banku Mundiál, ADB, DFAT/PARTISIPA nomos ANAS, I.P ne’ebé mak durante ne’e iha vontade tomak, hodi servisu hamutuk ho BTL, E.P, hodi haree ba sistema kanalizasaun bee iha TL, tantu servisu ne’ebé realiza ona nomos planu servisu ne’ebé sei implementa iha futuru, liu-liu iha parte servisu tékniku, advokasia no kapasitasaun ba rekursu umanu no seluk tan.
Atividade 2nd Joint Coordination Committee (JCC) meeting ne’e, organiza hosi JICA no partisipa mos hosi parseiru importante sira ne’ebé durante ne’e servisu hamutuk ho BTL, E.P, iha setór bee nian, hanesan reprezentante Banku Mundiál, DFAT/PARTISIPA ou reprezentante hosi Embaixada Austrália nian, ANAS, I.P nomos ekipa ADB liuhosi enkontru virtuál.
Share on Social Media:
