Díli, 26/01/2024. Vise-Prezidente Komisaun Ezekutiva Bee Timor-Leste, Empreza Públika (BTL, E.P) ba Asuntu Sistema Bee, Saneamentu no Drenajen, Sr. Gustavo da Cruz, partisipa iha enkontru koordenasaun servisu tékniku entre instituisaun relevante sira, iha salaun enkontru auditorium EDTL, E.P, Caicoli, Díli.
Objetivu hosi reuniaun ne’e, hodi koordena kona-bá servisu tékniku sira iha terrenu, ligadu ho problema inundasaun iha kapitál Díli. Tanba ne’e, liuhosi sorumutu ida ne’e, hodi tau hamutuk ideia, oinsá bele kria servisu integradu ida ne’ebé mak forte, hodi responde ou resolve problema refere.
Iha sorumutu ne’e, ko’alia mos kona-bá problema volume lixu ne’ebé aumenta no kontinua namkari iha fatin-fatin, ai-hun boot sira ne’ebé tohar iha Díli, drenajen ne’ebé nakonu ho sedimentasaun, poste eletrisidade no telkom nian. Nomos komunidade balun ne’ebé seidauk iha konsiénsia hodi kontroi uma iha valeta leten no taka bee dalan, fura ku’ak kanu no halo koneksaun bee ilegál no problema sira seluk. Tanba ne’e, presiza kooperasaun servisu entre liña ministeriál sira no instituisaun relevante sira, atu bele rezolve kestaun hirak ne’e,
Iha okaziaun ne’e, iha mos aprezentasaun kona-bá “Peskiza poste eletrisidade no telkom inklui aihun sira ne’ebé konsidera risku iha kapitál Díli” nomos “Mapeamentu no estudu basia retensaun Caicoli-RB1”. Hafoin fó mos biban ba partisipante sira hodi hato’o perguntas no sujestaun ou hanoin ruma relativamente ba asuntu refere.
Enkontru koordenasaun ne’e, abertura hosi Sekretáriu Estadu Eletrisidade, Bee no Saneamentu no partisipa direta hosi Sekretáriu Estadu Terras no Propriedade, Sekretáriu Estadu ba Asuntu Toponímia no Organizasaun Urbana, Prezidente Autoridade Munisípiu Díli, parte PNTL, MOP, BTL, E.P rasik, EDTL, E.P, DNRAS, empreza telekomunikasaun sira no partisipante sira seluk.
Share on Social Media:
