Díli, 02/10/2025. Vise-Prezidente Komisaun Ezekutivu (KE) Bee Timor-Leste, Empreza Públika (BTL, E.P) ba Asuntu Korporativu, Sr. Manuel Tomás Amaral de Carvalho, Diretór Administrasaun no Finansas (DAF), BTL, E.P, Sidónio Freitas, akompaña hosi Jestora Kontabilidade no Finansas nomos Auditora Auditoria Interna BTL, E.P nian, partisipa iha Audiénsia Públika kona-bá Esbosu Padraun Kontabilidade Setór Privadu faze daruak (II) nian, ne’ebé realiza iha salaun auditóriu Kay Rala Xanana Gusmão, Ministériu Finansas (MF), Aitarak-Laran.
Audiénsia públika ne'e nudár kontinuasaun faze dahuluk nian ne’ebé hala’o ona iha tinan kotuk, ho objetivu hodi halibur parte interesadu xave sira hosi órgaun no entidade oin-oin iha Timor-Leste (TL), atu hetan ideia ou opiniaun no rekomendasaun ne’ebé pozitivu, hodi kontribui ba melloramentu ba padraun ida ne’e, atu bele sai padraun ida ne’ebé kualidade no kumpri duni ba padraun ne’ebé mak aplika internasionalmente nomos tuir kontestuál TL nian.
Audiénsia públika ne'e, sai mos oportunidade esensiál ida, atu kria forum kolaborativu ida, entre entidade sira tantu setór públiku no setór privadu, hodi nune’e bele kria ekosistema kontabilístika ne’ebé forte iha TL, hodi kontribui ba dezenvolvimentu rekursu umanu nomos dezenvolvimentu ekonomia TL nian. Tanba ne’e, ho partisipasaun entidade nian importante tebes, atu bele atinji objetivu sira relativa ho reforma sistema kontabilístika TL nian, tuir orientasaun no baze legál sira ne’ebé estabelesidu ona.
Partisipa iha atividade audiénsia ne’e, hosi entidade oin-oin hosi órgaun estadu nian, sosiedade sivil, akademista, empreza públiku no privadu sira nomos profisionál kontabilista sira
Share on Social Media:
