Díli, 05/02/2024. Vise-Prezidente Komisaun Ezekutiva Bee Timor-Leste, Empreza Públika (BTL, E.P) ba Asuntu Boa Governasaun no Fortalesimentu Institusionál, Sr. Elizabeth Amaral akompaña hosi Diretór DOM, Jestór no funsionáriu sira partisipa iha seremónia içar bandeira nasionál Repúblika Demokrátika Timor-Leste (RDTL) ne’ebé realiza iha edifísiu Ministériu Obras Públikas (MOP), Mandarin, Díli.
Durante iha seremónia ne’e, inspetór içar bandeira nasionál, Vise-Ministru Infraestrutura Sr. Júlio Do Carmo, iha nia intervensaun husu ba funsionáriu sira hotu, atu tau importánsia ba seremónia esensiál ida ne’e, tanba ema barak mak sakrifika aan hodi liberta rai ida ne’e. No tenke prepara di’ak liu tan, hatudu disiplina no unidade, nune’e hodi sai ezemplu di’ak ba instituisaun seluk nomos jerasaun foun sira.
Iha okazisaun ne’e, Vise-Ministru Infraestrutura husu ba dirijente no funsionáriu sira, atu kontinua servisu maka’as, kolabora no nafatin kria liña koordenasaun ne’ebé di’ak, hodi ezekuta servisu tuir planu programa ne’ebé mak trasa ona, hodi dezenvolve infraestrutura iha territóriu nasionál.
Seremónia içar bandeira nasionál, iha semana dahuluk ba fulan fevereiru ne’e, lidera hosi Vise-Ministru Infraestrutura Sr. Júlio Do Carmo no partisipa máximu hosi funsionáriu sira, tantu hosi Empreza Públika no Institutu Públiku, SEEAS, gabinete MOP no VMI nomos diresaun hirak ne’ebé tutela ba iha MOP.
Share on Social Media:
