Díli, 03/01/2025. Vise-Prezidente Komisaun Ezekutiva (KE) Bee Timor-Leste, Empreza Públika (BTL, EP) ba Asuntu Tékniku, Sr. José Filipe Ximenes Smith akompaña hosi tékniku sira observa tanke rezervatóriu no torneira públiku ne’ebé instala ona, iha Tasi-Tolu Raihun.
Vise-Prezidente KE BTL, E.P ba Asuntu Tékniku ho ekipa tun ba observa direta tanke no torneira iha fatin refere, tanba tuir informasaun katak, iha abitante balun kuru hotu bee, la taka torneira bee, nune’e husik bee sulin estraga de’it iha fatin ne’e.
Tanba ne’e, Ezekutivu tun ba terrenu, hodi ko’alia direta ho abitante sira no husu ba sira, atu kuida bee, labele husik bee sulin estraga, wainhira kuru hotu bee, tenke taka torneira, nune’e bele fó espasu ba konsumidór sira seluk, hodi asesu mos bee iha tanke no torneira públiku refere.
Alen de ne’e, Ezekutivu BTL, E.P ho tékniku sira kontinua observa no identifika fatin seluk iha área Tasi-Tolu nian, atu instala tan tanke rezervatóriu no torneira públiku, nune’e hodi fasilita komunidade sira ne’ebé seidauk hetan bee, bele asesu mos bee.
Iha biban ne’e, Vise-Prezidente KE BTL, EP ba Asuntu Tékniku ho ekipa hasoru no dadalia mos abitante sira iha área ne’e kona-bá tarifa bee no abitante sira prontu atu kontribui selu tarifa bee, wainhira sira asesu ona bee.
Tuir planu semana oin, ekipa BTL, E.P sei hahú instala tanke rezervatóriu ho litru 5200 (5200L) ida, iha fatin ne’ebé identifikadu ona no BTL, E.P sei transporta ou tula bee ba enxe iha tanke ne’e, hafoin komunidade sira bele asesu bee hosi tanke rezervatóriu refere no konsumidór uma kain ida-idak sei kontribui sentavus 10.
Share on Social Media:
