Viqueque, 17/01/2025, Vise-Prezidente KE BTL, E.P ba Asuntu Tékniku, Sr. José Filipe Ximenes Smith, Vise-Prezidente KE BTL, E.P, ba Asuntu Korporativu, Sr. Manuel Tomás Amaral de Carvalho, hamutuk Jestór Infratrutura BTL, E.P, Engiñeiru no Kordenadór BTL, E.P halo monitoriza ba projetu konstrusaun sistema fornesimentu bee moos, lokaliza iha Postu Administrativu Uatucarbau.
Vise-Prezidente Komisaun Ezekutiva BTL, E.P, ba Asuntu Tékniku hatete, objetivu hosi hasoru malu ne’e, pontu importante mak atu halo re-konfirmasaun ba informasaun, hodi halo sinkronizasaunba asuntu, ne’ebé maka durante ne’e sai obstakulu, dezafiu, sai impedimentu, ne’ebé prejudika projetu ne’e sei labele termina tuir nia tempu, ne’ebé asina ona iha kontratu.
“Maske nune’e ha’u rona informasaun hosi parte kompañia ho karta por eskrita katak servisu la’o di’ak tebes no rona informasaun hosi autoridade sira mos mos hanesan, tan ne’e BTL, E.P nia parte maka hanesan lideransa foun, iha prontidaun atu apoia ba servisu hotu-hotu”.
Ezekutivu ne’e, husu mos ba Autoridade hanesan Administradór, Xefe Suku, Xefe Aldeia no Autoridade Seguransa, atu bele asegura sistema no fasilidade sira, ne’ebé governu sei harii, bele utiliza ba tempu naruk, hodi nune’e komunidade sira bele asesu bee moos. Wainhira laiha kontrolu maxímu hosi autoridade sira maka sei akontese sistema ne’e sobu no hadi’a, maka sei afeita ba dezenvolvimentu nunka atu hakat pasu ida ba oin.
Iha fatin hanesan, Vise-Prezidente Komisaun Ezekutiva BTL, E.P, ba Asuntu Korporativu afirma, prezensa ida ne’e laos iha problema, maibé nu’udar direjente foun hanesan mos estrutura BTL, E.P, atu reafirma de’it pozisaun, hodi fo kontinuidade bao bra hirak, ne’ebé ezekutivu sesante husik hela. Tamba ne’e iha periodu mandatu maka oinsa bele aselera servisu hodi dezenvolve setór bee, atu bele fasilita populasaun sira asesu bee.
“Ohin ami mai atu halo konfirmasaun direita, ao mezmu tempu atu husu nafatin ba hotu-hotu, tamba Estadu ne’e ida de’it, BTL, E.P hanesan instituisaun subordinadu ida, ne’ebé tutela ba ministériu obras públikas, ho objetivu ida de’it, oinsa bele lori dezenvolvimentu bee moos ne’e ba komunidade sira”.
Vise-Prezidente mos orienta, ba Supervizor BTL, E.P, atu halo akompañamentu ba obra ne’e, hodi finaliza tuir termu kontratu, ne’ebé estabele ona, nune’e mos bele garante ba projetu nia fiziku ho kualidade di’ak, tuir dezeñu no BoQ. Supervazor sira hanesan liman ba BTL, E.P iha terrenu, tenki halo kontrolu maxímu, nune’e kompañia implementadór ba projetu bele hatudu servisu di’ak, tamba osan ne’ebé ita jere ne’e povu nian”.
Projetu Konstrusaun Sistema Fornesimentu Bee Moos iha P.A Uatucarbau, munisípiu Viqueque ne’e, sei implementa hosi kompañia Helfia Unipessoal Lda. ho durasaun tempu fulan 12 (tinan ida) no orsamentu ne’ebé prevé ba projetu refere ho montante $ 1.334,472.11.
Projetu bee moos ne’e ho sistema gravitasaun, nune’e sei kanaliza bee hosi bee matan Weebati ne’ebé lokaliza iha suku Irabi de Baixo ho nia débitu 45 l/s. No projetu bee moos ne’e, sei transforma ba sistema urbana, iha ne’ebé sei instala mos metru kontadór ba benefisiáriu sira. Alende ne’e, projetu kanalizasaun refere sei instala kanu transmisaun ho distánsia kilómetru 8 (8 km), enkuantu instalasaun liña distribuisaun ho distánsia kilómetru 11 (11 km).
Enkuantu projetu ne’e rasik, sei kobre iha suku Irabin de Baixo no Uani-Uma, iha postu-administrativu Uatucarbau, ho totál populasaun 5910, nune’e mos sei instala metru kontadór unidade 985 ba uma kain 985, inklui sei fornese mos bee ba postu saúde, eskola, merkadu no igreja.
(Média_BTL, E.P)
Share on Social Media:
