Díli, 31/01/2025. Jestór Infraestrutura Bee Timor-Leste, Empreza Públika (BTL, EP) ho Enjeñeiru sira, Monitoriza projetu Water System Emergency Repair Bee Moos Section 3, Dili and Aileu Municipality, iha área Casnafar.
Atividade monitorizasaun ne’e, hodi observa direta obra fíziku kona-bá melloramentu sistema bee, liu-liu instalasaun liña transmisaun bee iha área Casnafar nian.
Tuir observasaun iha terrenu, kompañia implementadór finaliza ona instalasaun liña transmisaun no hahú hakoi ou taka hikas rai henek ba kanu ne’ebé instala ona, nune’e hodi proteje Polypipe no evita estragus iha futuru.
Projetu melloramentu liña transmisaun ne’e, ho total distánsia metru 600-resin (684.4m) no daudaun ne’e, hakoi ona metru 250m (250m). Enkuantu instalasaun liña transmisaun foun ne’e, hodi troka sistema tuan no Polypipe foun ne’e ho medida PE NOD 450.
Orsamentu ne’ebé hodi finansia projetu melloramentu ne’e, ho totál $ 304,101.74 no ezekuta hosi kompañia Reinassance Unip Lda.
Liña transmisaun ne'e mak sei kanaliza bee hosi intake Tohumeta ba tanke rezervatóriu sira iha ETA Bemos no Central, hafoin hodi distribui fila-fali ba konsumidór sira.
Share on Social Media:
