Manufahi, 18/10/2022, Tékniku Operadór (T.O) Bee Timor-Leste, Empreza Públika (BTL, E.P) munisípiu Manufahi halo ligasaun bee foun ba komunidade sira nia hela fatin, iha aldeia Raimerak, suku Babulu, postu-administrativu Same, munisípiu Manufahi.
Koordenadór BTL, E.P Manufahi informa, tékniku operadór sira ba halo ligasaun bee ba komunidade uma kain ida, tamba sira ba rejista no halo ona pagamentu iha edifísiu BTL, E.P munisípiu Manufai, hodi sai kliente ba BTL, E.P.
Alende ne’e, tékniku operadór sira kontinua halo ligasaun bee foun ba komunidade, iha aldeia Rialau, suku Letefoho, tamba sira mos ba rejista no selu ona iha BTL, E.P Manufahi.
Tuir informasaun hosi BTL, E.P Manufahi katak, tékniku sira halo uluk ligasaun foun no seidauk instala metru kontadór, tamba sei hein materiál hosi nasionál, wainhira materiál hirak ne’e to’o ona iha Manufahi, mak tékniku sira sei ba halo instalasaun metru kontadór ba komunidade sira ne’ebé antes ne’e, kanaliza uluk ona bee ba sira nia uma.
Entretantu hahú hosi fulan Janeiru to’o Outubru tinan ne’e, BTL, E.P Manufahi halo ona ligasaun bee foun ba komunidade uma kain 40, la inklui metru kontadór bee nian, maibé BTL, E.P Manufahi planeia ona atu instala mos metru kontadór ba kliente sira ne’ebé durante ne’e asesu ona kanalizasaun bee hosi BTL, E.P,
Enkuantu Koordenadór BTL, E.P Manufahi hatama ona proposta hodi rekiza metru kontadór hamutuk unidade 250, hodi instala ba komunidade sira ne’ebé seidauk iha metru kontadór
Alende ne’e, wainhira komunidade sira ne’ebé asesu ona bee ne’ebé mak kanaliza hosi BTL, E.P, presiza rejista nune’e bele kontribui reseita ba kofre Estadu.
Share on Social Media:
