Manatuto, 20/12/2022, Pesoál Apoiu Kliente Bee Timor-Leste, Empreza Públika (BTL, E.P) munisípiu Manatuto halo atendimentu ba kliente sira ne’ebé bá selu tarifa bee, iha edifísiu BTL, E.P, postu-administrativu Manatuto Villa, munisípiu Manatuto, tanba sira asesu ona sistema kanalizasaun bee hosi BTL, E.P.
Molok kliente sira bá halo pagamentu, antes ne’e leitór sira tun ona ba terrenu hodi lee metru kontadór no informa ona presu tarifa bee nian ba kliente sira. No presu bee ne’e rasik, tuir gastu bee lor-loron nian.
Koordenadór BTL, E.P munisípiu Manatuto informa, reseitas ne’ebé BTL, E.P Manatuto rekolla durante fulan tolu, hahú hosi fulan outubro to’o dezembru tinan 2022 ne’e hamutuk $ 5.419,30
Tuir dadus, BTL, E.P Manatuto rejista ona kliente doméstika hamutuk 1380, kompsotu hosi kliente ne’ebé iha ona metru kontadór no kliente ne’e asesu ona sistema bee hosi BTL, E.P maibé seidauk monta metru kontadór. Kliente ne’ebé iha ona metru kontadór hamutuk 1257 no kliente ne’ebé seidauk iha metru kontadór hamutuk 123. Nomos kliente hosi instituisaun públiku sira hamutuk 67.
Kaptasaun reseitas hirak ne’e, hodi hatama ba kofre estadu nomos hodi garante sustentabilidade ba manutensaun sistema bee moos nian.
Share on Social Media:
