Manatuto, 18/12/2023. Koordenadór Bee Timor-Leste Empreza Públika (BTL, EP) munisípiu Manatuto hamutuk ho ekipa Departamentu Apoiu Kliente Manatuto nian halo sosializasaun kona-bá Dekretu Lei no Diploma Ministeriál BTL, E.P nian ba abitante sira, iha sede aldeia Carlilo, suku Aiteas, postu-administrasaun Manatuto Villa, munisípiu Manatuto.
Ekipa BTL, E.P disemina informasaun kona-bá Dekretu Lei nú. 41/2020 loron 25 fulan Setembru ne’ebé ko’alia kona-bá “Kriasaun Bee Timor-Leste, Empreza Públika (BTL, E.P), Dekretu Lei nú. 4/2004 loron 11 fulan Fevereiru, kona-bá “Aprova Rejime Fornesimentu Bee ba Konsumu Públiku”, nune’e mos Diploma Ministeriál nú. 1/2004 loron 11 fulan Fevereiru ne’ebé ko’alia kona-bá “Tabela Tarifária” no ikus liu Diploma Ministeriál nú. 1/2009 loron 5 fulan Outubru, kona-bá “Fiskalizasaun Sistema Abastesimentu Bee”.
Diseminasaun ne’e hodi partilla informasaun kona-bá, regulamentu hotu ba komunidade sira, atu sira bele hatene regras, nune’e sira labele viola dekretu lei no diploma ministeriál ne’ebé mak eziste ona no sita kona-bá proibisaun halo koneksaun bee ho ilegalmente ba sistema sira, tau matan ba sistema ne’ebé instala ona nomos oinsá atu bele selu tarifa bee moos nian, hafoin sira asesu ona bee hosi BTL, E.P.
Tuir relatu hosi BTL, E.P Manatuto katak, komunidade sira ne’ebé partisipa iha sosializasaun ne’e, asesu hotu ona bee moos ne’ebé kanaliza hosi BTL, E.P inklui instala ona metru kontadór ba benefisiáriu ida-idak nia hela fatin. Tanba ne’e, sira koopera no prontu hodi kontribui reseitas ba Estadu, liuhosi selu tarifa bee moos.
Partisipa iha atividade sosializasaun ne’e mak Komandante Eskuadra PNTL Munisípiu Manatuto, Xefe suku Aiteas, xefe aldeia Carlilo no komunidade Aiteas.
Share on Social Media:
