Díli, 18/07/2024. Vise-Prezidente Komisaun Ezekutiva (KE) Bee Timor-Leste, Empreza Públika (BTL, E.P), ba Asuntu Sistema Bee, Saneamentu no Drenajen, Sr. Gustavo da Cruz akompaña hosi Diretór Operasaun no Manutensaun (DOM) Aleixo dos Santos hamutuk ho ekipa BIR hosi MOP akompaña S.E Ministru Obras Públikas (MOP) Samuel Marçal halo monitorizasaun ba projetu emerjénsia estrada urbana no drenajen ne'ebé paralelu ho servisu melloramentu sistema bee urbanu, iha kapitál Díli.
Atividade monitorizasaun ne’e, hodi observa direta servisu fíziku iha terrenu, atu nune’e hodi hatene progresu servisu hosi projetu hirak ne’e.
Ohin, ekipa konjunta ne’ebé lidera hosi Ministru Obras Públikas observa ou halo monitorizasaun ba projetu emerjénsia sira ne'e, hahú hosi Manleuana, Raikotu, projetu konstrusaun altar ba vizita Sua Santidade Papa Francisco nian, iha Tasi-Tolu, Delta, Aimutin, Aitarak-Laran no ikus liu Cristo Rei.
Durante monitorizasaun projetu iha terrenu, identifika mos liña distribuisaun no ligasaun bee moos balun ne’ebé hetan estragus, ho nune'e Ministru Obras Públikas orienta kedas BTL, E.P atu bele hadi’a imediatu, nune’e labele prejudika abastesimentu bee moos ba abitante sira. No iha biban ne'e, Vise-Prezidente KE BTL, E.P ba Asuntu Sistema Bee, Saneamentu no Drenajen hatete BTL, E.P prontu no sei fó orientasaun ba tékniku sira, atu hadi’a kanu hirak ne’e, iha tempu badak.
Enkuantu servisu melloramentu sistema bee urbanu iha fatin hirak ne’e paralelu ho projetu konstrusaun no alargamentu estrada urbana inklui drenajen sira, ho nune’e wainhira kompañia konstrutór sira nahe estrada no konstroi drenajen, ekipa BTL, E.P kontinua instala kedas kanu distribuisaun sira iha estrada ninin no valeta sorin, atu nune’e ba futuru labele ke’e tan estrada.
Alen de ne’e, durante iha servisu alargamentu estrada no konstrusaun drenajen ne’e mak ke’e estraga kanu sira, kompañia sei koordena ho BTL, E.P, hodi orienta tékniku sira bele halo kedas intervensaun hodi hadi’a hikas estragu sira, nune'e bele garante nafatin distribuisaun bee ba konsumidór sira.
Share on Social Media:
