Bobanaro, 10/04/2025, Prezidente Komisaun Ezekutiva, Bee Timor-Leste, Empreza Públika, Sr. Gustavo da Cruz, Vise-Prezidente Komisaun Ezekutiva BTL, E.P, ba Asuntu Tékniku, Vise-Prezidente KE BTL, E.P ba Asuntu Tékniku, Sr. José Filipe Ximenes Smith, Vise-Prezidente KE BTL, E.P, ba Asuntu Korporativu, Sr. Manuel Tomás Amaral de Carvalho, Diretór DEI BTL, E.P, Jestór Infratrutura BTL, E.P, Kordenadór BTL, E.P Munisípiu Bobonaro no ekipa tomak, lansa projetu melloramentu ba sistema fornesimentu bee moos ba faze primeiru kanlizasaun nian, ne’ebé hala’o iha Edifísiu Administrasaun Postu Balibo.
Iha intervensaun, Prezidente Komisaun Ezekutiva, Bee Timor-Leste, Empreza Públika, Sr. Gustavo da Cruz, informa komunidade sira postu Balibo katak, Polítika IX governu iha vontade tau preoridade ba setór bee no saneamentu, ne’eb’e sei foka liu halo investimentu iha kapitál postu administrativu sira iha territóriu nasionál, ne’ebé fora hosi kapitál munisípiu.
Prezidente BTL, E.P afirma, BTL, E.P iha planu negósiu ba preoridade sira, ne’ebé maka sei foka liu iha postu administrativu sira, dadaun ne’e iha Timor-Leste, kapitál postu administrativu, ne’ebé eziste fora hosi kapitál munisípiu sira ne’e, hamutuk 52, ne’ebé BTL, E.P aposta nia estratéjia hodi mellora sistema bee moos iha postu administrativu 52 no mos kapitál munisípiu sira.
“Iha munisípiu Bobonaro, BTL, E.P halo ona investimentu iha postu Cailaco liberta ona, iha ne’ebé komunidade sira dadaun ne’e asesu bee ho regular 24 horas, nune’e aplika ona tarifa bee ba kliente sira hodi kontribui, iha postu adminitrativu Lolotoe la’o hela (ongoing) no ohin ita lansa tan iha postu administrativu Balibo, enkuantu iha postu rua seluk hanesan Atabae no Bobonaro iha hela faze preparasaun, atu implementa, ida ne’e esforsu tomak governu ida ne’e halo atu liberta kapitál postu sira. Iha postu administrativu Balibo nia situasaun kona-bá bee moos ha’u hatene muito bem, tan ne’e ita halo melloramentu di’ak liu tan, iha postu ida ne’e. Inan no aman sira hatene katak, investimentu iha bee ne’e, hanesan mos investe iha saúde no edukasaun. Wainhira bee laiha ne’e nia sofrementu afeta liu ba ina no oan sira, tamba bee laiha maka oan sira sei la asesu ba edukasaun”.
Ezekutivu ne’e akresenta liu tan, lansamentu ba projetu melloramentu ba sistema fornesimentu bee moos ida ne’e, konsidera mos preoridade liu ba postu administrativu Balibo, nune’e komunidade sira, bele kopera no kontribui ba prosesu implementasaun ba projetu ida ne’e, atu bele finaliza tuir termu kontratu, ne’ebé estabelese ona.
Lider maxímu BTL, E.P mos husu ba kompañia implementadór, tenki servisu makaas hodi kumpri ba ba kalendáriu kontratu no ha’u sei la tolera kompañia atu fo razaun klasiku, maibé kumpri durasaun ba kontratu ne’e rasik, wainhira la tuir kontratu ida ne’e maka BTL, E.P sei toma medidas rigorozu ba kompañia refere.
Iha biban ne’e, Prezidente Autoridade Munisípiu Bobonaro, hato’o agradesimentu ba BTL, E.P, tamba bele lansamentu ona projetu melloramentu ba sistema fornesimentu bee moos iha postu administrativu Balibo.
Ha’u senti projetu bee moos ida ida ne’e, hanesan milagre ida, tamba teki-teki ha’u simu informasaun katak atu implementa projetu bee moos ida ne’e, hoi da ne’e ha’u kontente tebes, tamba tinan barak populasaun sira halerik ba bee, maib’e ho prejensa BTL, E.P ida ne’e espera bele responde ona preokupasaun komunidade nian.
Iha okaziaun ne’e mos Autoridade ne’e fo mensajen ba abitante sira katak, tenki kontribui no servisu hamutuk ho kompañia implementadór no BTL, E.P, hodi dezenvolve setór bee.
Obra ida ne’e sei finansia ho orsamentu dollar amerikanu $ 677,781.20, nune’e moa benefisiáriu ba sistema bee moos ida ne’e uma kain hamutuk 373 no mos edifísiu públiku sira hanesan, eskola, saúde, PNTL, Administrasaun no Igreja.
Iha serimónia lansamentu projetu bee moos ida ne’e, partisipa hosi,reprezentante SEEAS, PMU BTL, E.P/MOP, Administradór Postu Administrativu Balibo, Komandante Eskudra PNTL Balibo, Xefe Suku, Xefe Aldeia, komunidade no partisipante sira seluk.
Share on Social Media:
