Ermera, 07/05/2025, Prezidente Komisaun Ezekutiva, Bee Timor-Leste, Empreza Públika (BTL, E.P), Sr Prezidente Komisaun Ezekutiva, Bee Timor-Leste, Empreza Públika, Sr. Gustavo da Cruz, Vise-Prezidente Komisaun Ezekutiva BTL, E.P, ba Asuntu Tékniku, Vise-Prezidente KE BTL, E.P ba Asuntu Tékniku, Sr. José Filipe Ximenes Smith, Vise-Prezidente KE BTL, E.P, ba Asuntu Korporativu, Sr. Manuel Tomás Amaral de Carvalho, Diretór DEI BTL, E.P, Jestór Infratrutura BTL, E.P ho ekipa, lansa projetu melloramentu ba sistema fornesimentu bee moos ba faze primeiru kanlizasaun nian, ne’ebé hala’o iha Edifísiu Administrasaun Postu Hatolia B.
Iha intervensaun, Prezidente Komisaun Ezekutiva, Bee Timor-Leste, Empreza Públika, Sr. Gustavo da Cruz, informa komunidade sira postu Hatolia B katak, Polítika IX governu iha vontade tau preoridade ba setór bee no saneamentu, ne’ebé sei foka liu halo investimentu iha kapitál postu administrativu sira iha territóriu nasionál, ne’ebé fora hosi kapitál munisípiu.
Prezidente BTL, E.P afirma, iha timor-leste, postu administrativu hamutuk 52 maka fora hosi kapitál munisípiu, hosi postu 52 ne’e, BTL, E.P konsege implementa ona projetu ba postu hamutuk 30.
Ezekutivu ne’e akresenta liu tan, lansamentu ba projetu melloramentu ba sistema fornesimentu bee moos ida ne’e, konsidera mos preoridade liu ba postu administrativu Hatolia B. Prezidente Konsellu Administrasaun BTL, E.P ne’e, husu ba autoridade lokál, komunidade no veteranu sira, kontribui liu hosi koperasaun ho kompañia implementadór no BTL, E.P hosi bele aselera prosesu kontrusaun ne’e finaliza tuir nia tempu.
Lider maxímu BTL, E.P mos husu ba kompañia implementadór, tenki servisu makaas hodi kumpri ba ba kalendáriu kontratu no ha’u sei la tolera kompañia atu fo razaun klasiku, maibé kumpri durasaun ba kontratu ne’e rasik, wainhira la tuir kontratu ida ne’e maka BTL, E.P sei toma medidas rigorozu ba kompañia refere.
Iha fatin hanesan, Administrador postu administrativu Hatolia B, lori povu postu administrativu Hatolia B, hato’o agradesimentu ba governu, liu-liu BTL, E.P, ne’ebé bele responde ona populasaun nia preokupasaun durante ne’e, liga ba bee moos.
Autoridade nee afirma katak, autoridade iha prontidaun hamutuk ho komunidade sira, atu halo akompañamentu regular, hodi bele garante nafatin prosesu konstrusaun ba obra ida ne’e, la’o ho di’ak.
Obra ida ne’e sei finansia ho orsamentu dollar amerikanu $ 424,515.42, nune’e moa benefisiáriu ba sistema bee moos ida ne’e uma kain hamutuk 225, ho populasaun 1.350 no mos edifísiu públiku sira hanesan, eskola, saúde, PNTL, Administrasaun no Igreja.
Share on Social Media:
