Ermera, 29/05/2023, Prezidente KOmisaun Ezekutiva BTL, E.P, Eng. Carlos Peloi dos Reis, akompaña husi Diretór DEI BTL, E.P, Jestór Infraestrutura BTL, E.P, Engiñeiru, Prezidente Konsellu Fiskál no Vogál Konsellu Administrasaun BTL, E.P, Valentim da Costa Pinto, Reprezentante Prezidente ANAS, I.P, hamutuk ho Administradór Postu Administrativu Atsabe, Autoridade lokál no partisipantes sira seluk Lansa Projetu Tanke BPT no pakote Fornesimentu & Instalasaun Prefabricated Liner Tank, iha postu-administrativu Atsabe, munisípiu Ermera.
Iha serimónia ne’e, Prezidente Komisaun Ezekutiva BTL, E.P informa, durante la’o prosesu ida ne’ebé naruk, to’o ona iha konkluzaun ida, kompañia sira hetan konfiansa tuir sira nia kapasidade hodi halo servisu ba projetu konstrusaun sistema bee moos iha Postu Administrativu Atsabe, Munisípiu Ermera. Ida ne’e esforsu ida ne’ebé BTL, E.P halo maka atu lori bee ba komunidade sira iha territóriu nasionál.
Liu husi oportunidade ida ne’e, Prezidente K.E BTL, E.P, partilla informasaun oituan, relasionadu ho servisu, ne’ebé BTL, E.P halo ona, liu-liu mellora servisu sistema bee moos iha Timor-Leste.
“Durante ita boot sira asesu informasaun liu husi Pajina BTL, E.P, Youtube, Website no mos média nasionál sira katak, polítika BTL, E.P nian tau preoridade kanaliza bee hodi liberta uluk Kapitál Postu Administrativu sira, ne’ebé fora husi Kapitál Munisípiu, hanesan Postu Administrativu 48, hodi fasilita populasaun iha Postu Administrativu sira bele asesu bee. Durante ne’e BTL, E.P konsege Lansa ona Projetu Konstrusaun Sistema Bee Moos no Melloramentu sira la’o ona iha postu administrativu sira hamutuk 32, enkuantu 16 ne’e, balun iha ona prosesu dezeñu no balun iha ona prosesu aprovizionamentu, ne’ebé tuir previzaun katak sei bele lansa hotu projetu ba Postu administivu sira sei lansa hotu iha tinan ne’e”.
Ezekutivu ne’e afirma katak, polítika ida tau preoridade ba kapitál postu sira, ho intensaun liberta uluk postu, nune’e komunidade sira la halerik ona ba bee moos, BTL, E.P mos halo esforsu liberta kapitál munisípiu sira, iha ne’ebé munisípiu Baucau, Viqueque, Lautém, Manufahi no Díli, prosesu dezeñu detalladu finaliza ona, iha semana kotuk projetu melloramentu sistema bee moos ba Munisípiu Baucau nian aprova ona husi Konsellu Ministru, ne’ebé faze tuir mai sei loke tenderizasaun. Munisípiu sira seluk maka iha tinan kotuk finaliza hotu ona Planu Mestre, ne’ebé iha tinan ne’e sei ba faze dezeñu detalladu, nune’e tinan oin bele lansa hotu ona.
“Alende tau matan ba Postu Administrativu no Kapitál munisípiu, promove projetu mos ba Suku balun, hanesan iha Suku Cribas ne’ebé pertense ba munisípiu Manatuto no mos Suku Bualale, Postu Administrativu Quelicai, Munisípiu Baucau, tamba e’e BTL, E.P nafatin kompremitidu halo mudansqa hodi dezenvolve setór bee no saneamentu iha territóriu nasionál. Iha alternativu seluk ka mekanizmu ida maka autoridade lokál suku no aldeia halo pedidu mai iha BTL, E.P hodi apoia material ba sira, atu kanaliza bee, hodi bele asesu bee moos hanesan mos komunidade sira seluk”.
Lider Maxímu BTL, E.P ne’e mos husu ba autoridade lokál sira iha baze, atu apoia BTL, E.P hodi fahe servisu, hanesan funsaun BTL, E.P nian hare ba parte tékniku, autoridade lokál nia papel maka aproxíma komunidade sira, atu bele rezolve kestaun sosiál sira, nune’e labele halo impedimentu ba projetu refere.
Administradór Postu-Administrativu Atsabe Constâncio da Silva hatete, lori povu Atsabe, agredese ba oitavu governu konstitusionál, liu husi Bee Timor-Leste Empreza Públika, tamba tinan barak komunidade sira halerik ba bee moos, maibé dadaun ne’e BTL, E. konsege lansa ona projetu ne’e, fiar katak sei benefisia ba abitante sira, hodi asesu bee moos.
Administradór ne’e realsa, prontu kolabora ho BTL, E.P no kompañia implementadór sira, hodi bele garante nafatin implementasaun ba projetu ida ne’e, labele iha impedimentu komunidade balun. Autoridade maxímu iha Atsabe ne’e mos kompremitidu katak sei iha problema sosiál ruma akontese, maka sei halo esforsu hodi bele rezolve, nune’e projetu ida ne’e bele finaliza tuir durasaun tempu ne’ebé hakerek ona iha termu kontratu.
Projetu Konstrusaun Tanke Distribuisaun (BPT/Distribution Tank) Sistema Bee Moos Ergina P.A Atsabe ne’e,sei implementa hosi kompañia Tersanjung Unipessoal Lda, totál orsamentu $ 310,465.79, ho durasaun tempu fulan neen.
Alende ne’e, kompañia Biamali Unipessoal Lda, sei halo servisu kona-bá Projetu Pakote Fornesimentu & Instalasaun Prefabricated Liner Tank, ba iha postu-administrativu Atsabe, munisípiu Ermeran, (Zona Ergina no Anilaba), ho durasaun tempu fulan neen no orsamentu ne’ebé sei prevé ba projetu ne’e, hamutuk $ 242,541.54.
Projetu rua ne’e. sei benefisia ba komunidade sira iha aldeia 24, suku lima, ho totál populasaun rihun 10 resin, inklui sei fornese mos bee ba instituisaun sira hanesan, postu saúde, eskola, sede suku, no igreja.
Share on Social Media:
