Díli, 04/04/2023, Prezidente Komisaun Ezekutiva (K.E) Bee Timor-Leste, Empreza Públika (BTL, E.P) Eng. Carlos Peloi dos Reis asina kontratu ho kompañia sira hanesan kompañia Hezeldan Unipessoal Lda joint venture ho Milcha Unipessoal Lda nomos Nautetu Fátima Unipessoal Lda, kona-bá implementasaun Projetu Konstrusaun Sistema Bee Moos ba iha postu-administrativu Baguia no Quelicai, munisípiu Baucau. Seremónia asina kontratu ne’e, realiza iha salaun enkontru, edifísiu sentrál BTL, E.P, Caicoli.
Molok asina kontratu ho kompañia manan na’in sira, Prezidente K.E BTL, E.P husu ba sira, atu kumpri regras ne’ebé estabelese ona iha kontratu laran, katak tenke finaliza obra fíziku, tuir tempu ne’ebé parte rua (BTL, E.P no kompañia implementadór) konkorda ona. Alende ne’e, Prezidente KE BTL, E.P mos husu ba kompañia implementadór sira, tenke garante mos kualidade projetu ne’e rasik, nune’e komunidade sira bele uza ba tempu naruk.
Ezekutivu BTL, E.P solisita ba kompañia sira atu koopera ho BTL, E.P nomos Autoridade lokál sira no tenke mantein komunikasaun entre parte tolu ne’e, wainhira akontese problema ruma durante implementasaun projetu fíziku iha terrenu, presiza informa lalais, hodi rezolve imediatu, nune’e labele prejudika obra fíziku iha terrenu.
Iha biban ne’e mos, Ezekutivu BTL, E.P husu ba Autoridade postu-administrativu Baguia, Quelicai no suku sira, atu servisu hamutuk ho BTL, E.P no kompañia sira, nune’e wainhira implementasaun projetu fíziku iha terrenu, mak akontese problema sosiál ruma, Autoridade lokál sira apoia hodi rezolve, atu nune’e labele atraza obra iha terrenu.
Iha fatin hanesan, Administradór postu-administrativu Quelicai, Mateus Soares Cabral, agradese ba BTL, E.P maske liuhosi prosesu naruk maibé konsege hetan duni kompañia hodi implementa projetu konstrusaun bee moos iha Quelicai. Hanesan autoridade lokál prontu atu servisu hamutuk ho kompañia no BTL, E.P hodi implementa projetu bee moos to’o susesu. Administradór ne’e mos garante sei laiha impedimentu ruma durante implementasaun projetu fíziku iha terrenu. Tanba dada bee mos ba Quelicai ne’e, signifika atu fasilita nesesidade povu nian iha Quelicai.
Alende ne’e, Administradór postu-administrativu Baguia, António dos Ramos agradese ba BTL, E.P tanba bele aprova ona projetu bee moos, atu implementa iha sira nia postu, nune’e hodi hakmaan populasaun sira nia preokupasaun durante ne’e no sira prontu atu koopera ho parte hotu, hodi haree ba implementasaun projetu ne’e rasik. Administradór ne’e husu atu tau prioridade mos ba kultura, katak tenke halo tuir kultura, nune’e wainhira iha prosesu konstrusaun labele mosu problema ruma ou bee labele maran.
Iha biban ne’e, Na’in ba kompañia Nautetu Fátima Unipessoal Lda, Maria Madalena dos Santos Fátima agradese ba BTL, E.P tanba bele fó konfiansa ba sira, hodi implementa projetu konstrusaun sistema bee Quelicai. Alende ne’e, na’in ba kompañia ne’e mos promete, iha tempu badak sei mobiliza materiál ba fatin konstrusaun nian, atu hahú halo servisu no prontu hodi ezekuta no finaliza projetu ne’e tuir tempu ne’ebé estabelese ona iha kontratu, maibé depende mos ba kondisaun klima ou forsa natureza ne’ebé sei mosu, hodi difikulta servisu fíziku iha terrenu, maibé hanesan kompañia nafatin esforsu kualker situasaun saida de’it mak akontese iha terrenu, tanba ne’e sira nafatin husu kooperasaun servisu entre BTL, E.P no autoridade lokál sira. Kompañia mos sei garante kualidade projetu no segundu sira hakarak bee ne’e bele to’o iha Postu refere, nune’e bele fornese ba komunidade sira.
Enkuantu Projetu Konstrusaun Sistema Bee Moos iha P.A Baguia ne’e, sei implementa hosi kompañia Hezeldan Unipessoal Lda joint venture ho Milcha Unipessoal Lda. Orsamentu ne’ebé sei gasta ba projetu refere ho montante $ 844,640.87 ho durasaun tempu fulan neen.
Alende ne’e, kompañia Nautetu Fátima Unipessoal Lda, sei kaer obra kona-bá Projetu Konstrusaun Sistema Bee Moos ba iha postu-administrativu Quelicai, ho durasaun tempu fulan neen no orsamentu ne’ebé sei prevé ba projetu ne’e hamutuk $ 518,518. 45.
Projetu sistema bee moos iha Baguia nian sei kobre iha suku tolu, hanesan suku Alawa Leten, Alawa Kraik no Haekoni, postu-administrativu Baguia Villa ho totál populasaun rihun 2950, inklui sei fornese mos bee ba instituisaun sira hanesan, postu saúde, eskola no igreja. Fontes bee matan ne’ebé sei kanaliza bee ba postu Baguia ne’e mai hosi bee matan Mosa-Ira. Sistema bee moos ne’e sei transforma ba sistema urbana, iha ne’ebé sei instala mos metru kontadór ba benefisiáriu sira
Enkuantu projetu sistema bee moos iha Quelicai nian sei benefisia ba populasaun sira iha postu-administrativu Quelicai Villa no sei fornese mos bee ba instituisaun sira hanesan postu saúde, eskola no igreja. Bee matan ne’ebé sei kanaliza ba postu refere mai hosi Kele-Ira no Uasabere-Gia, Sistema bee moos ne’e sei transforma ba sistema urbana, iha ne’ebé sei instala mos metru kontadór ba benefisiáriu sira.
Share on Social Media:
