Díli,13/03/2023, Prezidente Komisaun Ezekutiva (K.E) Bee Timor-Leste, Empreza Públika (BTL, E.P) Eng. Carlos Peloi dos Reis asina kontratu ho kompañia rua hanesan kompañia Tersanjung Unipessoal Lda, Biamali Unipessoal Lda, kona-bá implementasaun Projetu Konstrusaun Tanke BPT no Pakote Fornesimentu & Instalasaun Prefabricated Liner Tank ba iha postu-administrativu Atsabe, munisípiu Ermera. Seremónia asina kontratu ne’e, realiza iha salaun enkontru, edifísiu sentrál BTL, E.P, Caicoli.
Molok asina kontratu ho kompañia rua ne’e, Prezidente K.E BTL, E.P husu ba kompañia manan na’in sira, atu kumpri regras ne’ebé estabelese ona iha kontratu laran, katak tenke finaliza obra fíziku, tuir tempu ne’ebé parte rua (BTL, E.P no kompañia implementadór) konkorda ona, wainhira la kumpri mak BTL, E.P rasik sei fó sansaun ba kompañia sira, liuhosi aplika multa ba kompañia implementadór sira. Tanba ne’e, solisita ba kompañia sira atu koopera, hodi ezekuta servisu ho lalais tuir termu kontratu no tenke garante mos kualidade projetu ne’e rasik, nune’e komunidade sira bele uza ba tempu naruk.
Iha biban ne’e mos, Ezekutivu husu ba Autoridade postu-administrativu Atsabe no suku sira, atu servisu hamutuk ho BTL, E.P no kompañia sira, nune’e wainhira implementasaun projetu fíziku iha terrenu, mak akontese problema sosiál ruma, Autoridade lokál sira apoia hodi rezolve, atu nune’e labele atraza obra iha terrenu.
Hafoin asina kontratu, Jestór Peskiza, Estudu no GIS BTL, E.P, Almeida Boavida reforsa, selebrasaun kontratu ne’e, hodi halo konstrusaun ba tanke distribuisaun (BPT/distribution tanke) no pakote fornesimentu no instalasaun prefabricated liner tank, ne’ebé sei fornese bee ba komunidade sira ne’ebé hela iha suku lima, iha postu-administrativu Atsabe
Iha fatin hanesan, Administradór postu-administrativu Atsabe, Constáncio da Silva agradese ba BTL, E.P no nudár autoridade lokál prontu atu servisu hamutuk ho kompañia no BTL, E.P hodi implementa projetu hirak ne’e iha Atsabe. Administradór ne’e mos garante sei laiha impedimentu ruma durante implementasaun projetu fíziku iha terrenu.
Enkuantu Projetu Konstrusaun Tanke Distribuisaun (BPT/Distribution Tank) Sistema Bee Moos Ergina P.A Atsabe ne’e, sei implementa hosi kompañia Tersanjung Unipessoal Lda, ho totál orsamentu $ 310,465.79 ho durasaun tempu fulan neen.
Alende ne’e, kompañia Biamali Unipessoal Lda, sei halo servisu kona-bá Projetu Pakote Fornesimentu & Instalasaun Prefabricated Liner Tank ba iha postu-administrativu Atsabe, munisípiu Ermeran (Zona Ergina no Anilaba), ho durasaun tempu fulan neen no orsamentu ne’ebé sei prevé ba projetu ne’e hamutuk $ 242,541.54
Projetu rua ne’e, sei benefisia ba komunidade sira iha aldeia 24, suku lima, ho totál populasaun rihun 10 resin, inklui sei fornese mos bee ba instituisaun sira hanesan, postu saúde, eskola, sede suku no igreja.
Share on Social Media:
