Díli, 22/11/2023, Prezidente Komisaun Ezekutiva (K.E) Bee Timor-Leste, Empreza Públika (BTL, E.P) Eng. Carlos Peloi dos Reis, akompaña hosi Vise-Prezidente KE BTL, E.P ba Asuntu Boa Governasaun no Fortalesimentu Institusioál, Sra. Elizabeth Amaral, Diretór DEI, Jestór Legál ho ekipa selebra kontratu ho kompañia neen, ne’ebé kaer obra kona-bá projetu Konstrusaun sistema fornesimentu bee moos iha Fatululik, projetu melloramentu sistema fornesimentu bee moos iha Laleia, supply & installation prefabricated liner tan inklui fence ba iha Zumalai, supply & installation prefabricated liner tanks ba iha Baguia, supply and delivery of laboratory reagents for water supply quality test for BTL, E.P nomos pakote perfurasaun ba rekursu bee moos iha Atabae no Aileu-Villa. Seremónia asina kontratu ne’e, realiza iha salaun enkontru, edifísiu sentrál BTL, E.P, Caicoli.
Molok asina kontratu ho kompañia manan na’in sira, Prezidente K.E BTL, E.P solisita ba autoridade lokál atu koopera ho BTL, E.P no kompañia implementadór, hodi apoia rezolve problema sosiál no kulturál sira, nune’e labele prejudika implementasaun projetu fíziku iha terrenu.
Iha okaziaun ne’e, Ezekutivu BTL, EP ne’e mos husu ba kompañia manan na’in sira, atu kumpri regras ne’ebé esbelese ona, katak implementa projetu fíziku tuir tempu ne'ebé estabelese ona iha kontratu laran, tenke tenke utiliza materiál sira ho kualidade tuir dezeñu BoQ ne’ebé mak iha nomos tenke garante kualidade projetu ne’e rasik, nune’e komunidade sira ne’ebé sai benefisiáriu ba projetu refere bele utiliza ba tempu naruk.
Diretór kompañia Reza Kontrusaun, Rogério M.M Viegas agradese ba BTL, E.P tanba fó fiar hodi halo melloramentu sistema fornesimentu bee moos iha postu-administrativu Laleia no sira prontu atu ezekuta servisu, tanba hahú ona asina kontratu signifika servisu mos hahú ona, ida ne’e responsabilidade kompañia nian, maibé projetu refere atu finaliza tuir tempu, depende ba klima.
Iha fatin hanesan, Xefe suku Fatululik, Carlos Mendonça sente kontente tanba populasaun sira presiza duni bee moos, nune’e ohin loron, governu iha ona planu hodi dada bee ba komunidade, hein katak projetu ida ne’e finaliza, bele fornese hotu ba komunidade iha fatin refere. Alende ne’e, hanesan Lideransa komunitária, nia prontu hodi servisu hamutuk ho kompañia implementadór no BTL, E.P, atu nune’e bele finaliza lalais projetu ne’e.
Projetu ba konstrusaun sistema fornesimentu bee moos, sei implementa iha postu-administrativu Fatululik, munisípiu Covalima no ezekuta hosi kompañia Laviana Dezes Unipessoal Lda ho kustu $ 460.827,38.
Enkuantu projetu melloramentu sistema fornesimentu bee moos nian, sei implementa iha postu-administrativu Laleia, munisípiu Manatuto hosi kompañia Reza Construction Unipessoal Lda no orsamentu ne’ebé sei gasta ba projestu ne’e $ 565.203,55. Projetu melloramentu bee moos ne’e, iha futuru sei kobre suku rua iha postu Laleia Villa, mak suku Haturalan ho Lifau nomos sei fornese bee ba fasilidade públiku sira, hanesan sentru saúde, eskola, postu administrasaun, igreja no postu polísia. Alende ne’e, sistema bee moos ne’e sei transforma ba sistema urbana, iha ne’ebé sei monta mos metru kontadór bee ba benefisiáriu sira.
Alende ne’e, kompañia Virvania Unipessoal Lda sei supply & installation prefabricated liner tank ba postu-administrativu Baguia, munisípiu Baucau hamutuk unidade hitu, ho kapasidade 25m3 unidade tolu, 50 m3 tolu no 170 m3 ida ho orsamentu $ 218.461,70. Enkuantu kompañia Bia Basan Mogen Unipessoal Lda sei responsabiliza ba pakote supply & installation prefabricated liner tank inklui fence ba iha postu-administrativu Zumalai, munisípiu Covalima, ho nia kapasidade 60m3 unidade ida, 100m3 unidade haat, 180m3 unidade ida ho kustu $ 289.681,96. Kompañia Greenbox Unipessoal Lda sei supply and delivery of laboratory reagents for water supply quality test for BTL, E.P ho totál orsamentu $ 128.778,00.
Ikus liu, kompañia H2O Unipessoal Lda sei ezekuta servisu pakote perfurasaun ba rekursu bee moos, iha postu-administrativu Atabae, munisípiu Bobonaro no postu-administrativu Aileu-Villa (Aisirimou), munisípiu Aileu ho kustu $ 103.944,30.
Durasaun tempu ba ezekusaun projetu hirak ne’e, hosi fulan haat to’o fulan neen no bele estende maibé tenke iha razaun ne’ebé razoavel hanesan klima (udan no inundasaun) ne’ebé la permite atu halo servisu iha terrenu no BTL, EP sei la konsidera, wainhira kompañia fó razaun ne'ebé la forte ou la razoável.
Share on Social Media:
