Díli, 07/11/2022, Prezidente Komisaun Ezekutiva (K.E) Bee Timor-Leste, Empreza Públika (BTL, E.P) Eng. Carlos Peloi dos Reis hatete, BTL, E.P kontinua promove projetu melloramentu sistema fornesimentu bee moos, iha postu-administrativu no munisípiu sira, hodi hatan ba populasaun sira-nia preokupasaun, kona-bá bee moos no BTL, E.P mos kontinua esforsu hodi implementa tan projetu ne’ebé hanesan iha postu-administrativu no munisípiu sira seluk.
Ezekutivu hato’o asuntu ne’e, iha ámbitu seremónia asina kontratu ho kompañia lokál sira, iha salaun enkontru, edifísiu sentrál BTL, E.P, Caicoli, hodi responde ba perguntas hosi jornalista sira, kona-bá hahú inísiu to’o ohin loron, BTL, E.P promove ou implementa ona projetu melloramentu sistema bee moos hira, iha postu-administrativu no munisípiu sira.
“Daudaun ne’e, ita ko’alia kona-bá iha nível kapitál munisípiu nian, ita-nia projetu kona-bá sistema bee moos kobre ona kuaze munisípiu 11, mesmu sistema sira ne’e dalaruma hanesan balun di’ak no balun ladi’ak, maibé ita nafatin esforsu, atu bele halo operasaun no manutensaun ba sistema sira ne’e, nune’e hodi garante bee ba ita nia komunidade sira, ita mos iha projetu ida ne’ebé la’o hela, projetu ne’e ita lansa ona iha fulan rua kotuk liu ba, hein katak iha fulan haat ka lima tan, ita bele halo hotu ona, ho projetu ne’ebé ita jere tan iha Ataúro, entaun hamutuk 12 ona, ida ne’e iha nível munisípiu nian”, dehan Prezidente BTL, E.P
Ezekutivu akresenta BTL, E.P nia papel mak oinsá, atu bele lori bee hakbesik ba komunidade sira, iha postu-administrativu no munisípiu sira, tamba ne’e daudaun ne’e BTL, E.P nafatin esforsu hodi kontinua implementa projetu melloramentu kona-bá sistema fornesimentu bee moos no projetu melloramentu balun mos daudaun ne’e la’o hela, iha terrenu. Enkuantu projetu balun daudaun ne’e iha hela prosesu Aprovizionamentu nomos balun sei halo levantamentu dadus tékniku, molok hakat ba implementasaun.
“Iha kapitál postu sira ita iha projetu melloramentu 22 no projetu hirak ne’e ongoing hela, halo melloramentu, depois ita asina tan kontratu hodi implementa tan projetu, entaun projetu melloramentu sistema fornesimentu bee moos hamutuk 24 mak la’o hela. No projetu kuaze 22 mak iha hela prosesu aprovizionamentu, enkuantu 14 mak ami sei presiza halo levatamentu dadus, atu ita bele halo servisu projetu sira hanesan ohin, hodi halo melloramentu ba sistema, atu ita bele hadi’a sistema bee iha kapitál postu sira para média tinan oin sistema prontu no ita hein jere de’it”, hatete Ezekutivu.
Entretantu wainhira obra fíziku hosi projetu melloramentu ne’ebé implementa iha postu-administrativu sira finaliza, sei rekruta tékniku sira, atu bele destaka iha fatin hirak ne’e, hodi bele tau matan no jere sistema bee moos refere.
Share on Social Media:
