Díli, 17/03/2023, Hafoin finaliza perfurasaun bee iha Comoro C1, Ekipa Departamentu MoI, hosi Diresaun Enjeñaria no Investimentu (DEI) Bee Timor-Leste, Empreza Públika (BTL, E.P) akompaña kompañia Alifa Pereira Unipessoal Lda halo teste jeoelétriku ba fatin perfurasaun bee iha área Manleu Bua-Laran, postu-administrativu Dom Aleixo, munisípiu Díli.
Objetivu hosi teste jeoelétriku ne’e, hodi identifika rekursu bee iha rai okos, hafoin halo análize atu bele hatene kona-bá rekursu bee iha fatin refere di’ak ou lae nomos hodi hatene bee iha fatin ne’e boot ou lae, molok hakat ba faze perfurasaun.
Daudaun ne’e, kompañia sei halo análize ba teste jeoelétriku ne’e, hafoin remata kompañia sei aprezenta hikas rezultadu teste mai BTL, E.P hodi haree karik fatin ne’e iha poténsia rekursu bee, mak foin hakat ba projetu fíziku perfurasaun nian.
Perfurasaun bee ne’ebé sei implementa iha Manleu, Bua-Laran ne’e, hodi reforsa sistema bee ezistente sira, nune’e hodi fornese bee ba komunidade sira ne’ebé durante ne’e asesu bee hosi sistema Manleu.
Projetu Emerjénsia ba Servisu Perfurasaun Bee iha Kapitál Díli (Emergency Project for Water Drilling Works in Capital Dili) ne’e, projetu pakote ida, ne’ebé kompostu hosi perfurasaun iha Comoro C 1, Comoro C 2, Comoro F (Fomento), Bidau Masaur, Becora (Camea Cendana) no flushing no pumping test iha Bairo-Pité, tanba ne’e kompañia sei halo perfurasaun iha fatin lima no flushing & pumping test iha fatin ida.
Enkuantu perfurasaun bee iha Comoro C 1 nia finaliza ona ho rezultadu bee ne’ebé di’ak no kompañia hahú hakat fali ba Manleu, Bua-Laran nian, ne’ebé dadaun ne’e, halo hela análize teste jeoelétriku, hafoin haree tiha rezultadu mak kompañia hahú halo perfurasaun iha fatin refere.
Orsamentu ba pakote projetu emerjénsia ne’e (Emergency Project for Water Drilling Works in Capital Dili) ne’e, mai hosi Fundus Infraestrutura ho montante $ 258,534.23 no ezekuta hosi kompañia Alifa Pereira Unipessoal Lda ho durasaun tempu fulan neen.
Share on Social Media:
