Díli, 04/12/2024. Vise-Prezidente Bee Timor-Leste, Empreza Públika (BTL, E.P) ba Asuntu Tékniku, Sr. José Filipe Ximenes Smith, akompaña hosi Diretór Enjeñaria no Investimentu (DEI) BTL, E.P, Jestór Infraestrutura ho ekipa hamutuk ho kompañia nomos Administradór postu-Cristo Rei, xefe suku Becora, identifika fatin foun iha Becora, postu-administrativu Cristo Rei, munisípiu Díli, hodi halo perfurasaun bee foun, iha fatin refere.
Durante iha terrenu, Autoridade PA Cristo Rei no lideransa komunitária suku Becora hatete sira koopera no prontu apoia BTL, E.P no kompañia, hodi implementa projetu perfurasaun refere, nune’e labele hetan intervensaun ruma nomos kompañia bele aselera servisu fíziku iha terrenu.
Hafoin remata iha Becora, ekipa BTL, E.P ne’ebé lideradu hosi Vise-Prezidente KE BTL, E.P ba Asuntu Tékniku hamutuk ho kompañia kontinua halo aproximasaun ho Diretór eskola primária Bemori nian, hodi informa kona-bá planu perfurasaun bee foun iha aredór eskola refere. Ho nune’e parte eskola konkorda no prontu servisu hamutuk ba implementasaun projetu refere, No iha biban ne’e, ekipa BTL, E.P ho Diretór eskola identifika kedas fatin perfurasaun nian iha fatin ne’e.
Perfurasaun bee foun iha Becora ne’e, hodi reforsa tan sistema ezistente sira, iha parte Becora nian, hodi fornese bee moos ba abitante sira iha área Becora no Camea nian. Enkuantu perfurasaun seluk iha eskola primária Bemori nian ne’e, hodi fasilita nesesidade estudante no profesór/a sira nian, durante hala’o atividade letiva iha eskola ne’e.
Share on Social Media:
