Díli, 27/10/2022, Ekipa Bee Timor-Leste, Empreza Públika (BTL, E.P) hosi Zona 4 halo ligasaun bee foun unidade ida ba komunidade uma kain iha aldeia Moris ba Dame, postu-administrativu Dom Aleixo, munisípiu Díli.
Alende ne’e, tékniku operadór Zona 4 kontinua halo mos ligasaun bee foun unidade ba komunidade uma kain iha aldeia Fatumeta, munisípiu Díli.
Entretantu tékniku sira bá halo ligasaun bee ba komunidade sira-nia uma hirak ne’e, tamba antes ne’e, sira rejista no halo ona pagamentu, iha balkaun BTL, E.P, hodi sai kliente BTL, E.P, nune’e kliente sira ne’e, iha obrigasaun bele selu tarifa bee kada fulan, hafoin asesu ona kanalizasaun bee hosi BTL, E.P. enkuantu reseita ou taxa hosi tarifa bee moos ne’e rasik, hodi hatama ba kofre Estadu nomos BTL, E.P sei uza hodi garante sustentabilidade ba manutensaun sistema bee moos nian.
Koordenadór Zona 4 informa, hafoin finaliza ligasaun bee foun ba kliente sira-nia hela fatin, tékniku sira kontinua hadi’a sanyo ne’ebé aat, iha klínika Bairo-Pite nia oin. Tuir informasaun, Sanyo refere antes ne’e BTL, E.P mak oferese ba klínika, maibé aat tiha nune’e sira informa ba tékniku sira hodi ba hadi’a, atu nune’e bele utiliza hodi dada bee hosi sira-nia tanke ou rezervatóriu rasik, hodi uza ba nesesidade iha klínika ne’e.
Share on Social Media:
